Станува збор за Австрија, Данска, Франција, Германија, Италија, Холандија, Словенија, Шведска и Норвешка, за кои Комисијата издаде посебни мислења за оправданоста и пропорционалноста на мерките што се во сила повеќе од 12 месеци.
Комисијата признава дека земјите се соочуваат со безбедносни предизвици и миграциски притисоци, но нагласува дека контролите во рамките на Шенген мора да останат исклучителни и привремени мерки.
Брисел верува дека постојат поефикасни начини за решавање на безбедносните прашања без ограничување на слободното движење на луѓето.
„Постојат поефикасни и поефективни алтернативи на внатрешните гранични контроли“, соопшти Комисијата.
Како примери ги наведува полициските проверки засновани на проценка на ризик, мобилната биометриска идентификација и технологиите за следење на возила.
Според Комисијата, многу земји веќе користат несистематски полициски проверки засновани на разузнавачки податоци, кои би можеле дополнително да се прошират и постепено да ги заменат граничните контроли.
Европската комисија предупреди дека внатрешните гранични контроли влијаат не само на земјата што ги воведува, туку и на соседните земји и жителите на пограничните области.
Затоа, наведува Комисијата, е важно да се намалат негативните последици за патниците, работниците кои секојдневно ја преминуваат границата, економијата и регионалната соработка.
Врз основа на спроведената анализа, Комисијата препорачува деветте земји постепено да ги укинуваат постојните контроли, а воедно да користат повеќе алтернативни безбедносни мерки и да ја зајакнат соработката со соседите.
Извршната потпретседателка на Европската комисија за технолошки суверенитет, безбедност и демократија, Хена Виркунен, изјави дека слободата на движење е една од основните вредности на Европската Унија.
„Шенген е едно од најголемите достигнувања на Европа. Ја симболизира слободата на движење за повеќе од 450 милиони луѓе. Нашите мислења испраќаат јасна порака: кога контролите се враќаат, тие мора да останат привремени и исклучителни“, рече Виркунен.
