Според податоците објавени во средата во кинескиот регистар на клинички испитувања, компанијата има намера да ангажира 40.000 возрасни испитаници за трета фаза од клиничкото испитување.
На возрасните би им се дале две дози од потенцијалната вакцина на Пекинг Вонтаи или плацебо, во интервал од две недели.
Во регистарот не се наведува во колку земји компанијата ќе го спроведе истражувањето, но се вели дека етичкиот комитет на Филипините ја одобрил студијата, отстранувајќи ги пречките за потенцијалното спроведување на тестирањето во таа земја, пренесе Ројтерс.
Портпаролот на Пекинг Вонтаи рече дека евиденцијата за регистрација не значи дека компанијата официјално ја започнала третата фаза од клиничкото испитување.
Портпаролот рече дека компанијата чека дополнителни документи од властите, но не прецизира од кои земји.
Вакцина во спреј, како алтернатива на вообичаената инјекција во рака, може да предизвика специфични имунолошки реакции во дишните патишта со имитирање на природна инфекција со респираторен вирус.
Потенцијалната вакцина користи ослабен вирус на грип за да ги пренесе генетските информации за дел од коронавирусот.
