Ако пред неколку години читавте содржини на социјалните мрежи поврзани со убавината, веруваме дека се сеќавате колку беа популарни маските за лице на база на куркума. Овие рецепти ветуваа противвоспалително дејство, намалување на акните и ублажување на лузните на лицето. Сепак, се чини дека куркумата многу подобар ефект може да има кога се внесува преку исхраната, како вкусен зачин и додаток во јадењата.
Истражување покажа дека консумирањето половина до една лажичка куркума дневно е доволно за подобрување на воспалителните параметри во телото. Новото истражување оди чекор понатаму и открива дека овој зачин може да има позитивно влијание и врз здравјето на мозокот.
Куркума за здравјето на мозокот
Куркумата е светло жолт зачин што се добива од коренот на растението Куркума лонга и често се користи во азиската кујна, особено во јадења со кари. Освен што ѝ дава на храната боја и препознатлив вкус, позната е по својата активна состојка куркумин, кој има антиинфламаторни и антиоксидантни својства. Поради оваа причина, куркумата често се користи како додаток во исхраната за поддршка на општото здравје.
Противвоспалителното дејство на куркумата првенствено потекнува од куркуминот, нејзината најактивна состојка. Куркуминот помага во регулирањето и смирувањето на воспалителните процеси во организмот преку различни системи, поради што може да има позитивно влијание на сè – болки во зглобовите, акни, па и когнитивните функции.
Истражувањата спроведени на клетки, животни и луѓе укажуваат дека куркумата може да има значително влијание врз здравјето на мозокот. Се покажало дека помага во намалување на воспалението и таложење штетни протеини како амилоид-бета и тау, кои се поврзуваат со невродегенеративни болести. Исто така, може да поттикне создавање нови мозочни клетки (неврогенеза), да го подобри преносот на сигнали во мозокот и да ја поддржи рамнотежата на допамин. Покрај тоа, куркумата може да влијае врз регулирањето на гените поврзани со помнењето и да го намали присуството на токсини што се поврзуваат со Паркинсонова болест.
Иако е многу здрава, со внесувањето на куркума постои еден проблем – куркуминот, најважната состојка на овој зачин, тешко се апсорбира во организмот. Сепак, постојат начини неговата апсорпција да се подобри, без разлика дали станува збор за додатоци или за внесување преку исхраната. На пример, комбинацијата со пиперин од црн бибер може значително да ја зголеми апсорпцијата.
