Истражувањето опфати 386 мажи кои биле подложени на проценка на плодноста во седум центри за асистирана репродукција во Шпанија помеѓу јуни 2024 и декември 2025 година. Истражувачите споредиле податоци од четири региони: север, југ, југоисток и центар, за да утврдат дали разликите можат да се објаснат со животните навики или социодемографските фактори.
Резултатите покажале значајни регионални разлики во волуменот на семената течност, концентрацијата на сперматозоиди, нивната подвижност, морфологијата и вкупниот број подвижни сперматозоиди. Мажите од северна Шпанија имале просечен вкупен број подвижни сперматозоиди од 94,35 милиони, додека во централна Шпанија тој просек изнесувал 50,11 милиони. Северот забележал и највисока просечна концентрација на сперматозоиди – 80,96 милиони на милилитар, како и подвижност од 44,79 проценти.
Намалена подвижност на сперматозоидите била забележана кај 23,9 проценти од мажите на северот, во споредба со 55,4 проценти на југот и 53,4 проценти во централна Шпанија. Иако разликите во квалитетот на спермата биле изразени, животните навики главно биле слични во сите четири региони. По усогласувањето со измерените животни и социодемографски фактори, само географската локација и времетраењето на апстиненцијата останале независно поврзани со параметрите на семената течност.
Водечката авторка на истражувањето, Росио Нуњез-Калонге, изјави дека највпечатливо било тоа што најдобрите параметри на квалитетот на спермата доследно биле утврдени кај мажите од северна Шпанија.
„Ако, врз основа на резултатите од ова истражување, ги исклучиме животните навики на мажите како објаснување за забележаните географски разлики во квалитетот на спермата, веројатно е дека овие разлики се поврзани со различни нивоа на изложеност на животната средина, како што се загадувањето или други загадувачи“, рече таа.
Авторите наведуваат дека резултатите би можеле да бидат релевантни и надвор од Шпанија, бидејќи претходните истражувања во неколку земји покажаа разлики во квалитетот на спермата. Професорката Карен Сермон од ЕСХРЕ оцени дека влијанијата на факторите на животната средина се јасни и треба да се решат на општествено и политичко ниво.
