„Американскиот претседател беше во право. Едноставно ми се допаѓа човекот. Мислам дека она што го прави за НАТО е одлична вест“, изјави Руте во интервју за бриселски Политико.
Според него, Трамп во основа го постигнува она што американските претседатели се обидуваат да го постигнат уште од времето на Ајзенхауер, а тоа е изедначување на воените трошоци меѓу САД и Европа.
Како што рече, овогодишниот самит ќе биде „трансформативен“ за Сојузот, а исто така ќе вложи дополнителни милијарди во клучни одбранбени програми.
„Мора да изградите НАТО кое е одржливо, каде што Европејците и Канаѓаните навистина ќе го зголемат своето влијание“, верува Руте.
Како уште еден клучен двигател за повисоки трошоци за одбрана, Руте го издвои рускиот претседател Владимир Путин и рече дека сојузниците се решени да продолжат да ја поддржуваат Украина со пари и оружје, како и да ја градат сопствената одбрана за да одвратат евентуален руски напад.
„Мораме да го направиме тоа поради руската закана, а гледаме што прават Русите во Украина. Целта е да се одбранат милијарда луѓе во земјите на НАТО од руската закана, масовното кинеско засилување и фактот дека Русија, Кина, Северна Кореја и Иран работат заедно“, рече тој.
Тој исто така додава дека европските земји биле клучни за бомбардирањето на Иран.
„САД веројатно не би можеле да ја спроведат операцијата ’Епски бес‘ без да ја користат Европа како главна платформа за проекција на моќ“, рече Руте, потсетувајќи дека Романија го затворила својот најголем комерцијален аеродром за да им дозволи на американските авиони да полетуваат и слетуваат, и дека дури 5.000 авиони полетале од европските аеродроми оваа зима и покрај постојаното инсистирање на Трамп дека сојузниците не помагаат.
Руте истакна и дека НАТО, покрај разликите, сè уште е обединет со САД како полноправен партнер.
„Мислам дека Трамп е во право дека има поединечни случаи каде што со право е разочаран, но кога ќе ја погледнете пошироката слика за тоа што прават Европејците, тоа е огромно“, заклучи тој.
