Според извештајот на ОпенАИ, најизложени работни места се оние во кои голем дел од задачите можат да се извршуваат дигитално, аналитички или административно.
Меѓу нив се: деловни и финансиски операции, компјутерски и математички операции, управувачки операции, канцелариска и административна поддршка, архитектура и инженерство, правни операции, уметност, дизајн и медиуми, научни и истражувачки операции, продажба, образование и библиотекарство.
ОпенАИ проценува дека околу 18 проценти од работните места се изложени на реален ризик од автоматизација, додека за други 24 проценти би можело да се намали бројот на вработени. Сепак, тие нагласуваат дека техничката можност за автоматизација не значи автоматски губење на работни места.
ОпенАИ предлага владите да ги охрабрат работодавачите и синдикатите да воведат пилот-проект во четиридневна работна недела од 32 часа, а воедно да ја задржат целосната плата. Идејата е дека поголемата продуктивност, постигната со помош на вештачката интелигенција, не само што ќе се претвори во поголем профит за компаниите, туку и во конкретни придобивки за работниците.
Ваквите добивки би можеле да се искористат за трајно пократка работна недела, дополнителни слободни денови или подобри бенефиции за работниците. ОпенАИ, исто така, ја споменува можноста за повисоки пензиски придонеси, подобра здравствена заштита и субвенционирана грижа за деца.
Но, експертите предупредуваат дека ваквите промени нема да дојдат сами по себе. Професорката Џина Неф од Универзитетот во Кембриџ за Би-би-си изјави дека овие идеи би можеле да функционираат, но само со сериозна промена во политичките и деловните пристапи кон работата.
