Потоа се уапсени десет лица, меѓу кои и сега веќе поранешниот началник на белградската полиција Веселин Милиќ. Тој, со присуство на полициско обезбедување, отстранувал траги. Затоа е обвинет за непријавување и прикривање кривично дело. Неколку медиуми објавија, повикувајќи се на полициски извори, дека телото на убиениот е пронајдено изгорено во Шимановци, на 30 километри од Белград.
Меѓутоа, српскиот претседател Александар Вучиќ на прес-конференција изјави дека телото на убиениот сè уште не е најдено и дека потрагата е во тек. Некои адвокати веќе предупредија дека бројните изјави на Вучиќ ја попречуваат истрагата и претставуваат обид за контрола на штетата, пишува Дојче веле.
Интересно е што министерот за полиција Ивица Дачиќ воопшто не се огласи по извршеното кривично дело.
Скандалозниот факт дека еден од клучните началници на српската полиција е во близок контакт со криминални кругови и дека прикривал траги од убиство ја шокираше српската јавност.
Владата, од друга страна, се обидува да го минимизира настанот на секој можен начин, но адвокатот и поранешен министер за полиција Божо Прелевиќ истакнува дека „овој настан сведочи за метастазите на режимот кој не може да функционира без криминал“:
„Криминалците, од друга страна, сакаат да имаат некакви компензации и апанажи за она што го прават за владата. По природата на нештата, сега доаѓа до конфликт, а потоа имаме претседател кој се занимава само со прикривање на аферата. Сето ова заедно остава горчлив вкус на распадната држава каде што никој не ја врши власта, а потоа се прашуваат зошто нема отворање поглавја и напредок во европските интеграции“, вели Прелевиќ.
Политикологот Дејан Бурсаќ смета дека нема да биде лесно да се прикрие овој скандал и оценува дека „оваа афера прилично ја потресе јавноста“:
„Тука немаме случај на некоја вообичаена корупција, или некаков вообичаен контакт со некои сомнителни ликови. Мислам дека ова е далеку потешка ситуација, и за институциите и за режимот на Александар Вучиќ.
Очигледно е оценето дека јавноста не треба да се остави самата да носи заклучоци, и затоа претседателот на Србија мора секој ден да ја нуди својата верзија на вистината. Тој дури се чини дека е лут на полицијата, како да не е јасно дека полицијата е еден од столбовите на зачувување на режимот, кој главно се одржува со гола сила“, истакнува соговорникот на Дојче веле.
Не мал бројот на оние кои наведуваат дека таква афера во која било цивилизирана земја би довела до пад на владата и нови избори. Властите во Србија, како и обично, имаат поинаква пресметка и на дело е разводнување на приказната, вклучување на војската во потрагата по телото и прикривање на скандалот со некаков вид статистика за општ пад на кривичните дела и убиствата.
Божо Прелевиќ забележува дека „владата не може да падне во Србија, кога ние воопшто и немаме влада“:
„Имаме премиер кој работи два дена во неделата, а останатото време е во приватна клиника. Затоа имаме само еден човек, автократ кој ги згази сите институции. Само тој може да падне. Нема тука никаква одговорност. Инаку, ништо нема да се случи со Србија ако премиерот Ѓуро Мацут падне, бидејќи тоа нема да се забележи, ниту пак ќе направи никаква разлика. Големото прашање е дали имаме министер за полиција и дали му е дозволено да поднесе оставка? Имаме градоначалник на Белград кој е или во Италија или тренира ватерполисти. Вучиќ направи влада каква што не постои никаде во светот“, оцени Прелевиќ.
Сосема е сигурно дека барем министерот за полиција, а веројатно и целата влада, би поднеле оставка во голем број земји низ светот, вели Дејан Бурсаќ и додава:
„Тоа ни кажува на што Српската напредна партија ја темели својата влада. Нема закони, нема институции, нема здрав разум или нешто што би укажувало на некаков морал и пристојност. Само суво зачувување на власта со користење на средства за сила од една страна, а од друга страна продажба на магла за двата милиони гласачи што ви се потребни за да бидете на власт. Тие не се заинтересирани за никаква друга форма на власт“, вели Бурсаќ.
Репертоарот на изјавите на Александар Вучиќ по избувнувањето на оваа афера е широк. Тој почна, и тоа по 14 години владеење, со закани. Имаше и бизарна најава за „донесување нов закон, според кој на полицајците ќе им биде забрането да чуваат луѓе од подземјето“. Апсењето на Веселин Милиќ и други полицајци за властите е исто така доказ дека „нема заштитени лица“.
Законите на секоја демократска држава, па дури и на Србија денес, не дозволуваат таква комбинација на полиција и организиран криминал. Ова само покажува колку длабоко паднала Србија, коментира Божо Прелевиќ и истакнува дека „покрај тоа интересна е и најавата за отворање веб-страница на која граѓаните ќе можат да пријавуваат арогантни функционери на СНС“:
„А тие арогантни функционери на СНС само служат за заканување и всадување страв во коските на луѓето да гласаат за СНС. Секако, Вучиќ не вели дека нема арогантни функционери или дека „ќе направиме сè за да нема дилери на дрога“, туку вели дека полицијата нема да може да ги штити дилерите на дрога. Логиката овде повеќе не постои и ние живееме од скандал до скандал, а секој од овие скандали одзема некои животи“, нагласува Прелевиќ.
Ако дилерите на дрога имаат полициски значки или значки на тајната служба, сосема е јасно која партија им дозволила да ги имаат тие значки, забележува Дејан Бурсаќ и вели „ако имаат полициско обезбедување, сосема е јасно со чие одобрение е тоа направено“:
„Во текот на изминатата година и пол протести, можевме да видиме кој, заедно со полицијата, се обидува да го брани режимот од граѓаните. Тука има и криминалци и бандити, хулигани, под директна или индиректна заштита на полицијата. Вучиќ го кажа истото кога дојде на власт, а сега, по толку години апсолутна власт на хиперкорумпирана партија, тој демек се враќа на тоа дека ќе се бори против сето тоа. Мислам дека времето за тоа истече и не сум сигурен колку далеку можат да одат тие трикови во Србија денес“, заклучува Бурсаќ за Дојче веле.
