Државата Нов Јужен Велс соопшти дека не е јасно како неименуван маж во 60-тите години го добил вирусот, но како возач повремено превезувал екипаж на странски авиокомпании. Иако властите веднаш се обидуваат да го утврдат изворот на заразата, Нов Јужен Велс предупреди дека неименуваниот маж бил во кино и во повеќе од десетина кафулиња и продавници во источни предградија на Сиднеј, вклучувајќи ја и плажата Бонди, иако бил потенцијално заразен.
Првиот случај на зараза во еден месец е откриен во Нов Јужен Велс, додека истовремено втората најнаселена австралиска држава се бори да го сузбие кластерот на случаи на инфекција.
Државата Викторија забележала пет случаи на зараза во изминатите 24 часа, иако сите се поврзани со познати случаи, но властите соопштија дека ќе ги ублажат ограничувањата за петте милиони жители на Мелбурн. Од петок, на сите во Мелбурн ќе им биде дозволено да патуваат повеќе од 25 километри од својот дом, а маски повеќе нема да се носат на отворено. Мелбурн го укина двонеделното строго затворање кон крајот на минатата недела, четврто од почетокот на пандемијата, по избувнувањето на инфекција во која од 24-ти мај се пријавени околу 100 случаи.
Јавните собири ќе бидат зголемени на 20 лица, а забраната за домашни собири ќе биде укината. Теретаните може да се отворат низ Мелбурн, но мора да се почитуваат строгите правила за дистанцирање, а вработените во салоните можат да работат без маски.
„Сè уште не е готово. Ве молиме, не се однесувајте како апсолутно да нема никаков ризик”, рече главниот здравствен службеник на Викторија, Брет Сатон, за време на телевизиска медиумска конференција во Мелбурн.
Навременото барање контакти, брзото затворање и строгите мерки на физичко дистанцирање ѝ помогнаа на Австралија успешно да се избори со претходните жаришта и да го одржи својот број на случаи на релативно ниско ниво, со нешто помалку од 30.300 случаи и 910 смртни случаи. Викторија во последните девет дена ги бележи заразените со едноцифрен број, а другите држави и територии ефикасно го елиминираа вирусот.
