Околу 220.000 лица се евакуирани во Франција, додека повеќе од 75.000 се евакуирани во соседна Шпанија, а на уште 30.000 им е наредено да останат во своите домови, соопштија властите за време на викендот, додека Европа се справува со интензивен летен топлотен бран.
„Ова е пожар од размери што никогаш порано не сме ги виделе“, изјави денес Жером Стеф, градоначалник на Сестас. Сестас е едно од предградијата непосредно пред пошироката градска област на Бордо, каде што илјадници луѓе беа принудени да се евакуираат од своите домови и викендици.
Пожарите, кои избувнаа минатата недела во близина на атлантскиот брег, сега се на 15 километри (9,3 милји) од влезот во главната градска област на Бордо, објави Ројтерс.
Голем ризик претставува прогнозираното зголемување на температурите во Бордо до 37 степени Целзиусови подоцна оваа недела, според француската метеоролошка служба.
„Се работи за трка со времето пред да се врати топлотниот бран“, додаде Стеф.
Владата на претседателот Емануел Макрон ќе разговара за ситуацијата со шумските пожари на денешниот состанок на кабинетот.
Просечната максимална температура во регионот Аквитанија во јули досега била 32,2 степени Целзиусови, 7,3 степени над вообичаената месечна максимална температура забележана помеѓу 1961 и 1990 година, според податоците од климатскиот монитор на Ројтерс.
