На состанокот што ќе трае до среда, комитетот разгледува десетици номинации, а меѓу новите локации на листата се и древните јапонски царски центри Асука и Фуџивара и миграцискиот пејзаж Бома-Бадингило во Јужен Судан. Ова подрачје вклучува мочуришта, поплавни рамнини и савани низ кои, според УНЕСКО, се движат околу шест милиони белоушни антилопи, газели тианг и монгала, а подрачјето е и живеалиште на слонови, лавови и гепарди.
Француската номинација ги вклучува петте плажи за истоварување во Нормандија: Омаха, Јута, Сворд, Голд и Џуно, како и Поант ди Ок, местото на нападот што беше клучно во кампањата за ослободување на Западна Европа од нацистичката окупација. На овие локации, на 6 јуни 1944 година, се истовариле повеќе од 150.000 сојузнички војници. Меѓународниот совет за споменици и локалитети (ИКОМОС) наведе дека се зачувани многу остатоци, од германски утврдувања и пејзажи обележани од бомбардирањата до сојузнички пристанишни структури и потонати пловни објекти, оценувајќи дека станува збор за настан „кој нашироко се доживува како настан што овозможил враќање на слободата и го навестил трајниот мир на европскиот континент“.
ИКОМОС, исто така, повика на посилно следење и зачувување на овие локации поради притисокот од туризмот, климатските промени, зголемувањето на нивото на морето и развојот на ветерни фарми во близина. Постојаниот делегат на Франција во УНЕСКО, Ахлем Гарби, рече дека истоварувањето во Нормандија означило пресвртница од глобален конфликт кон повоен поредок заснован на мир и безбедност.
На Листата е впишан и Олимп, највисоката планина во Грција и митскиот дом на 12 олимписки богови, по 12 години настојувања на Атина ова подрачје да добие статус на мешано културно и природно наследство. Планината се издига до 2.918 метри и, покрај своето митолошко значење, се одликува и со богата биолошка разновидност. Градоначалникот на општината Дион-Олимп, Евангелос Геролиолиос, предупреди дека впишувањето на Листата „наметнува поголеми обврски за да ја заштитиме оваа животна средина“, особено поради можниот пораст на туризмот.
