„Секогаш кога мораше да избира помеѓу уставните принципи и интересите на Фидес, Шуљок ги избираше интересите на Фидес и тоа продолжува да го прави и денес“, рече премиерот Петер Маѓар во говорот пред гласањето, објави Политико.
Амандманот беше усвоен со 139 гласа „за“ и шест „против“, откако пратениците на Фидес го бојкотираа гласањето. Шуљок сега има пет дена да го потпише амандманот, а доколку не го стори тоа, Маѓар рече дека ќе биде отстранет од функцијата во парламентот.
Амандманот предвидува дека на Шуљок, кој ја извршува функцијата од март 2024 година, мандатот ќе му истече на денот по стапувањето во сила на истиот, а потоа парламентот ќе има 30 дена да избере нов претседател, чиј мандат нема да трае подолго од пет години.
Шуљок сега има можност да го испрати амандманот на разгледување до Уставниот суд, кој може да одлучува само за процедурални прашања, но не и за тоа дали е во согласност со уставот.
Амандманот, исто така, воведува задолжителна возраст за пензионирање од 70 години за сите судии на Уставниот суд, што би резултирало со разрешување на четворица актуелни судии, вклучувајќи го и претседателот на судот.
Поранешниот премиер и лидер на Фидес, Виктор Орбан, по гласањето во парламентот изјави дека неговата партија нема да ги признае агресивните методи на автократија.
„Доколку претседателот биде насилно сменет, Унгарија ќе има право да се спротивстави и ние ќе го искористиме тоа право“, рече Орбан.
