Владата на Зеленски уште во мај објави дека ќе разгледа можни мерки за зголемување на бројот на војници, откако преговорите со Русија за завршување на војната беа во застој. По состанокот со клучните министри, Зеленски во своето дневно обраќање кажа: „Се договоривме како финансиски да ја зајакнеме нашата одбрана и да продолжиме со трансформацијата на украинската армија“. Тој додаде дека владата ќе одобри специфичен механизам и дека првите нови исплати треба да започнат уште во јуни.
Украина обезбеди заем од 90 милијарди евра од Европската Унија, што ѝ овозможува на владата да ги зголеми трошоците за одбрана на рекордни 4,4 трилиони гривни (околу 82,5 милијарди евра) оваа година, а средствата треба да почнат да пристигнуваат овој месец. Зеленски најави дека владата ќе ја зголеми основната воена плата за една третина, на 30.000 гривни (околу 600 евра).
Воените аналитичари и економисти наведуваат дека целта на овој чекор е усогласување со просечната месечна плата во земјата, која постојано се зголемуваше поради недостигот од работна сила за време на војната. Пешадијата на фронтовската линија ќе добива просечна месечна плата од 300.000 гривни (околу 6.000 евра), што е зголемување од сегашните 100.000 на 150.000 гривни. Исто така, ќе им биде понуден нов вид договор на одредено време за борбени мисии, со времетраење од 10, 14 или 24 месеци.
Киев сака да регрутира и повеќе странски платеници. „Наредив да се создадат значително повеќе можности за регрутирање странски волонтери во украинската армија и да се отворат повеќе канали за регрутирање во оваа смисла“, кажа Зеленски.
Според проценките на украинските воени публикации, околу 10.000 странски доброволци од повеќе од 70 земји се приклучиле на украинската армија од почетокот на војната.
