Сајмон Стиел, извршен секретар на телото на ОН за климата, истакна дека постои научен консензус дека поради климатските промени предизвикани од човекот, топлотните бранови стануваат потопли, подолготрајни и почести.
„Овој најнов топлотен бран во Европа е брутален потсетник за растечките последици од климатската криза, и за луѓето и за економијата“, кажа Стиел. „Главната причина е глобалната зависност од согорувањето на јаглен, нафта и гас и уништувањето на шумите“.
„Овој топлотен бран предизвикан од климата е двојна закана, во време кога најновата војна на Блискиот Исток ги покажува зголемените трошоци за зависност од увоз на фосилни горива“, додаде тој, мислејќи на зголемувањето на цените на нафтата и гасот поради долгорочната блокада на Ормускиот теснец.
Националните власти низ Западна Европа денес ги повикаа жителите да преземат мерки за да се заштитат од топлината. Во Франција, националната метеоролошка служба Метео-Франс издаде портокалови предупредувања, второто највисоко ниво на опасност, за неколку оддели.
Портпаролката на владата Мод Брежон изјави вчера дека невообичаено високите температури довеле до седум „директни или индиректни“ смртни случаи, „вклучувајќи давења… како и смртни случаи поврзани со екстремна топлина за време на спортски настани“.
Во Германија, властите на западната покраина Северна Рајна-Вестфалија ги повикаа жителите да не полеваат градини или да полнат базени за да заштедат резервите на вода. Регионалниот министер за животна средина Оливер Кришер кажа дека иако во моментов „нема недостиг од вода… во време на климатски промени со долги периоди на топлина и суша, на крајот дури и најголемите резерви ќе пресушат“.
Жителите на Иберискиот Полуостров тешко спијат бидејќи ноќните температури остануваат над 20 Целзиусови степени. Португалските власти изразија загриженост дека топлината би можела да го зголеми ризикот од шумски пожари во јужниот регион Алгарве, клучна туристичка дестинација.
Слични спарни услови се забележани во Англија, каде што температурите во Лондон се искачија на 35,1Целзиусови степени вчера, далеку над претходниот мајски рекорд. Рекордни температури на сите времиња беа забележани и во Ирска.
Питер Торн, директор на Центарот за климатски истражувања ИКАРУС на Универзитетот Мејнут во Ирска, го опиша како „неверојатно лудо“ што рекордите се срушени со толку голема разлика. „Тешко е да се разбере дека рекордот на сите времиња во мај е срушен за повеќе од два степени, и тоа една недела пред крајот на месецот, кога нормално би очекувале да биде поставен рекордот“, рече тој.
Стиел, во меѓувреме, ги повика владите да ги засилат напорите за напуштање на фосилните горива што ја затоплуваат планетата. „Заштитата на човечките животи, компаниите и економиите од екстремна топлина и многу други растечки трошоци од климатските промени е клучна задача за секоја нација, а таа почнува со многу побрзо одвикнување од зависноста од фосилни горива“, порача тој.
Метеоролозите предвидуваат дека рекордниот топлотен бран ќе се ублажи овој викенд. Во Брисел се очекува температурата да се искачи на 31 Целзиусов степен во петок, по што ќе следи значително заладување.
