Полицијата соопшти дека го уапсила 51-годишниот Раул Моралес, а истрагата за мотивот на нападот сè уште трае. Според првичните резултати од истрагата, можно е психичката состојба на осомничениот да одиграла важна улога во инцидентот, изјави комесарката на њујоршката полиција Џесика Тиш.
Една од жртвите е маж од азиско потекло, а другата е Евреин. Двајцата, на возраст од 57 и 50 години, се здобиле со повеќекратни убодни рани на различни делови од телото. Полицијата наведува дека нападот не бил со ништо предизвикан и дека засега нема докази за каква било поврзаност на осомничениот со жртвите, ниту за меѓусебна поврзаност на двајцата нападнати мажи.
Полицијата го примила првиот повик на бројот 911 нешто по 13:30 часот по локално време. Првата жртва била пронајдена при свест со убодна рана во грбот, додека втората имала убодна рана во пределот на градниот кош. Едниот напад се случил на раскрсницата на Вест 84-та улица и Централ парк Вест, а другиот неколку блока подалеку, во близина на Вест 86-та улица. Двајцата повредени биле пренесени во болницата „Маунт Синај Морнингсајд“, каде што се задржани во стабилна состојба и се очекува да закрепнат.
Градоначалникот на Њујорк, Зохран Мамдани, изјави дека е запознаен со околностите на „страшниот напад“ и порача дека полицијата интензивно го истражува мотивот.
„За такви чинови на омраза и насилство нема место во нашиот град“, напиша Мамдани на социјалната мрежа Икс, изразувајќи задоволство што двете жртви се надвор од животна опасност.
I have been briefed on today’s horrifying stabbings on the Upper West Side, where an Asian man and a Jewish man were attacked. According to witness and victim statements, the perpetrator yelled “Allahu Akbar” during both attacks. I am relieved that both victims are in stable… https://t.co/0LSGtvPojx
— Mayor Zohran Kwame Mamdani (@NYCMayor) July 23, 2026
Сведоците ги опишаа сцените како исклучително вознемирувачки. Маријана Еленберг изјави дека видела маж како клечи на улицата со нож забоден во грбот.
„Таква сурова и насилна сцена среде бел ден тешко се заборава. Тоа ве потсетува колку чувството на безбедност може да исчезне за момент“, рече таа.
Членови на еврејската цивилна патрола „Шомрим“ соопштија дека пристигнале на местото на настанот по дојава на нивната телефонска линија. Според волонтерот Мајкл Џејкобс, еден од нападнатите носел кипа и најверојатно одел кон синагога или се враќал од неа. Нападот се случил на Тиша бе-Ав, еврејски ден на жалост и пост.
Џејкобс ја пофали брзата реакција на полицијата, истакнувајќи дека токму таа овозможила осомничениот брзо да биде уапсен.
