Иако до целосното затемнување на Сонцето остануваат уште две години, сместувачките капацитети во новозеландскиот град Данидин веќе се речиси целосно распродадени. Овој астрономски феномен, закажан за 22 јули 2028 година, ќе биде прв од ваков вид видлив од ова подрачје по повеќе од 850 години, што предизвика невиден интерес кај туристите од целиот свет.
Целосен мрак ќе настапи во 16:17 часот по локално време, кога Месечината ќе помине пред Сонцето и ќе фрли сенка широка околу 100 километри низ јужните делови на Нов Зеланд.
Зоната на целосна темнина ќе се протега од туристичкиот центар Квинстаун на запад до Данидин на исток, а дневниот мрак ќе трае точно две минути и 51 секунда.
Хотелите во Данидин во голема мера бележат рекордна пополнетост, а некои објекти, како што е „Данидин Лежер Лоџ“, веќе ги распродадоа специјалните пакети што вклучуваат заштитни очила за гледање.
„Ќе бидеме првите луѓе во Данидин што некогаш ќе видат целосно затемнување на Сонцето од овој дел од светот“, рече астрономот Иан Грифин, директор на музејот Тухура Отаго.
Тој објасни дека последниот ваков настан овде бил забележан во далечната 1163 година, пред доаѓањето на првите луѓе на Нов Зеланд.
Ова ќе биде и првото целосно затемнување видливо било каде во земјата од 1965 година.
Овој настан претставува огромен економски и туристички потенцијал за градот со 130.000 жители, за кој се очекува да привлече околу 35.000 гости.
Музејот во Данидин веќе започна со двегодишно одбројување, а градоначалничката Софи Баркер потврди дека возбудата веќе се чувствува низ целиот град.
Феноменот ќе се случи за време на новозеландската зима, веднаш по прославата на Матарики – маорската Нова година, која е именувана по ѕвезденото јато познато низ целиот свет како Плејади. По овој повод, градските власти планираат голем фестивал на ноќното небо што ќе ги поврзе овие два настани.
