Ракетата Ангара-А5 полета синоќа од воениот космодром Песецк на северот на земјата, наведе Роскосмос во соопштение.
Шефот на Роскосмос Дмитриј Рогозин на Твитер објави дека лансирањето минало успешно.
Тоа е од 2014 година трето пробно лансирање на ракетата Ангара, која е развиена во рамки на програмата наменета да ги замени застарените ракети носачи Протон чија технологија датира од 1960-тите.
Ангара, која е именувана по река во Сибир, користи почиста технологија и керозинско-кислородни мотори, кои многу помалку загадуваат отколку тие со гориво за придвижување на ракетите Протон.
Меѓутоа, програмата чија идеја е од 1990-тите, сепак доцни и не се исполнети роковите кои се поставени по првата проба во 2014 година.
Рускиот вселенски сектор по распадот на Советскиот Сојуз е погоден од низа скандали околу корупцијата, буџетските кастрења, доцнењата и непријатните технички инциденти.
Секторот во последно време се обидува да покаже подобро лице, објавувајќи, меѓу другото, амбициозни планови за вселенски туризам, како неодамнешното испраќање на јапонски милијардер во орбитата.
