Ави Леб, космолог што ги проучувал црните дупки и до 2020 година беше шеф на Катедрата за астрономија на Харвард, неодамна беше назначен за претседател на еден нов научен советодавен совет. Неговата задача ќе биде да го истражува потеклото на мистериозните светлечки сфери и други објекти што во последните години ги пријавуваат американски воени лица.
Назначувањето е дел од иницијативата на претседателот Доналд Трамп за декласификација на поголем број информации поврзани со НЛО, кои денес официјално се нарекуваат неидентификувани аномални феномени (УАП), пренесе Асошиејтед прес.
„Ова е како детективска приказна“, рече Леб во интервју. „Многу е интересно, сè додека не им обрнувате премногу внимание на критичарите.“
Од црни дупки до вонземски цивилизации
Во последната деценија Леб ги истражува небото и океаните во потрага по докази за интелигентен вонземски живот.
Неговата потрага започна во 2017 година, кога научниците го анализираа меѓуѕвездениот објект „Оумуамуа“, кој помина низ Сончевиот Систем. Додека повеќето истражувачи сметаа дека станува збор за комета или парче мраз, Леб тврдеше дека можеби се работи за тенко „светлосно едро“ што некогаш било дел од вонземско летало.
Поддршка кај љубителите на НЛО, критики од научниците
Неговите теории стекнаа голема популарност меѓу истражувачите на НЛО, но истовремено предизвикаа жестоки реакции во академската заедница.
Многу астрономи го обвинуваат дека изнесува сензационалистички тврдења без доволно докази и дека честопати ги претставува своите заклучоци во јавноста пред тие да поминат низ стандардната научна рецензија.
Астрофизичарот Стив Деш од Државниот универзитет во Аризона, кој оспорува дел од неговите теории, смета дека Леб користи погрешни методи за да дојде до спектакуларни заклучоци за вонземски живот.
„Не знам што ќе произлезе од ова, но сигурно нема да бидеме поблиску до одговорите ако тој го води проектот“, рече Деш.
Во тимот има научници, активисти и милијардер
Леб ги отфрла критиките, тврдејќи дека неговите противници немаат доволно имагинација за да разгледуваат нови идеи.
Тој нагласува дека анализите за Белата куќа ќе започнат со претпоставка дека сите неидентификувани појави се човечко дело и дека истрагата ќе биде насочена кон националната безбедност.
Сепак, верува дека подоброто собирање податоци за УАП може конечно да даде одговор дали човештвото некогаш било посетено од вонземска цивилизација.
Во неговиот тим има повеќе од десетина научници и активисти за НЛО. Меѓу нив е пензионираниот контраадмирал Тимоти Галодет, кој тврди дека постојат УАП управувани од „нечовечка интелигенција“ и дека САД поседуваат остатоци од урнати летала. Дел од тимот е и милијардерот Бен Лам, кој работи на оживување на исчезнати животински видови.
Побарани снимки и документи од Пентагон
По првиот состанок минатиот месец, советот испратил барање до Пентагон за повеќе од 50 видеоснимки, фотографии и документи поврзани со познати случаи на УАП.
Состаноците се одржуваат зад затворени врати, но Леб вети дека јавноста редовно ќе биде информирана и дека ќе биде отворена интернет-страница на која ќе се објавуваат резултатите.
„Во време кога науката не добива доволно признание, ова е можност да се направи нешто корисно за сите страни“, рече тој.
Нов одбор по налог на Трамп
Претходно оваа година Доналд Трамп издаде наредба за поголема транспарентност околу прашањата поврзани со НЛО и можниот вонземски живот.
Досега Пентагон објави неколку серии документи – од стари извештаи на ФБИ до понови воени видеоснимки на мистериозни сфери што се движат со голема брзина низ небото.
По наредбата на Трамп беше формиран Одбор за управување со УАП, кој работи под Канцеларијата на директорот на Националното разузнавање. Одборот првиот состанок го одржа во јуни, а научниот совет на Леб ќе биде едно од неговите главни советодавни тела.
Во меѓувреме, двопартиска група конгресмени бараат Белата куќа да објави уште повеќе информации, додека дел од републиканците тврдат дека американската влада крие докази за средби со вонземјани.
Белата куќа ги повика сите што располагаат со релевантни информации да се јават, но Канцеларијата на Пентагон задолжена за истрага на УАП соопшти дека досега не пронашла докази за постоење на вонземски живот.
Контроверзната експедиција во Пацификот
Пред да стане познат по своите теории за вонземјани, Леб важеше за угледен космолог што објавил стотици научни трудови за црните дупки и формирањето на галаксиите.
Во 2023 година неговиот тим привлече големо внимание кога со магнети извлече стотици мали метални сфери од дното на Тихи Океан, во близина на местото каде што во 2014 година паднал метеор.
По нивната анализа, Леб изнесе можност дека тие потекнуваат од далечна планета или дури од вонземска технологија. Други научници ги оспорија тие тврдења, оценувајќи дека најверојатно станува збор за вулкански материјал или јагленова пепел.
Шон Киркпатрик, физичар што претходно ја водеше канцеларијата на Пентагон за истражување на УАП, изјави дека Леб не ужива добар углед во научната заедница и нема искуство во областа на националната безбедност.
Белата куќа не одговорила на барањата за коментар во врска со критиките, додека Леб порача дека ќе продолжи да ја следи науката.
„Да ги држиме очите вперени во сферите, а не во социјалните мрежи“, рече тој.
