Како што пренесува Асошиејтед прес, годишната инфлација во Иран достигнала 53,7 отсто, додека цените на храната скокнале за неверојатни 115 проценти во однос на минатата година. Иранскиот ријал изгубил повеќе од половина од својата вредност, достигнувајќи рекордно ниско ниво од 1,9 милиони ријали за еден долар.
Меѓународниот монетарен фонд предвидува дека иранската економија во наредната година ќе падне за околу шест отсто.
Иако Иран со децении им одолева на санкциите, експертите предупредуваат дека цената на сегашниот судир е без преседан. Блокадата на Ормускиот теснец, преку кој се одвиваат 90 отсто од иранската трговија, практично го запрела извозот на нафта.
Жителите на Техеран сведочат за поскапување на основните намирници како пилешкото месо и јајцата за 45 до 60 отсто, додека автомобилските делови поскапеле петпати.
Новиот врховен водач Моџтаба Хамнеи ја нарече ситуацијата „економско бојно поле“ и ги повика работодавците да избегнуваат отпуштања.
Истовремено, претседателот на парламентот, Мухамед Багер Галибаф, апелираше до граѓаните да бидат штедливи, додека Обединетите нации проценуваат дека војната ќе турне уште неколку милиони Иранци под границата на сиромаштија.
