Истражувачите развиле евтин електрохемиски сензор кој може да открие допамин, невротрансмитер важен за движењето, учењето, мотивацијата и емоционалната регулација. Резултатите од истражувањето се објавени во списанието АЦС Омега.
Уредот бил тестиран на вештачки човечки солзи, при што успешно откривал различни концентрации на допамин. Оваа технологија во иднина би можела да помогне во развојот на нови методи за следење на Паркинсоновата болест и други состојби поврзани со нарушено ниво на допамин.
„Со создавањето на овој сензор, нашата цел е да го олесниме ултрараното откривање на невролошките нарушувања и да создадеме можности за клинички интервенции пред да се појават главните симптоми“, изјавил авторот на истражувањето, Нефтали Ленин Виљареал Карењо.
Зошто допаминот е важен за дијагностиката?
Промените во нивото на допамин – без разлика дали се повисоки или пониски од вообичаените вредности – се поврзани со различни невролошки и психијатриски заболувања.
Кај Паркинсоновата болест, на пример, нивото на допамин обично се намалува. Денешните методи за следење, како што се анализите на крв и урина или употребата на вградени медицински уреди, можат да бараат повеќе време или инвазивни процедури.
Солзите би можеле да претставуваат поедноставен и безболен извор на информации за здравјето на организмот, бидејќи лесно се собираат. Затоа Карењо и неговиот тим ја истражувале можноста за користење на солзите како неинвазивен начин за следење на нивото на допамин.
Како функционира новиот сензор?
Сензорот, изработен од електрично спроводлив графен, создава електричен сигнал кога допаминот реагира со неговата површина. Во лабораториски тестови на вештачки човечки солзи, тој прецизно ги откривал различните концентрации на допамин, вклучувајќи ги и нивоата поврзани со Паркинсоновата болест, а останал ефикасен и во присуство на други соединенија во солзите.
Истражувачите наведуваат дека овие резултати претставуваат основа за идни истражувања со вистински примероци од човечки солзи, со цел развој на брзи дијагностички уреди за следење на биомаркерите поврзани со невролошките заболувања.
