Филмот „Кома“ од официјалната селекција синоќа беше прикажан во амфитеатарот во Дојран во присуство на бројни вљубеници на филмската уметност.
Режисерот на филмот Агим Абдула е гостин на фестивалот „Преку езерото“ и посочи дека инспирација за филмот бил вистински настан кој се случил на негов познаник. Во филмот Абдула нѐ потсетува на скапоценоста на пријателството во нашите кревки животи.
„Филмот е направен според вистински настан. Му се случи на еден мој близок пријател. Во Италија му се случи несреќа и падна во кома. Во почетокот дознавме дека починал, па бил во клиничка смрт, па потоа се вратил, но меморијата му беше како на 5-годишно дете. Не се сеќаваше на никој од нас пријателите и лекарите посочија дека излез е да се врати дома, каде што е неговото семејство, пријателите и само така има надеж да се врати. Мојот братучед беше цели 7 години, секој ден со него, и конечно успеа да си ја врати меморијата и сега тој е оженет човек со деца и има среќен живот, но не памети дека некогаш му се случила несреќата“, рече Абдула.
Филмот има бавно темпо и долги сцени кои како што рече режисерот се резултат на неговото студирање филмска режија во Иран, но сакал да се гледа печатот на школата од која доаѓа.
Во Дојран заедно со режисерот на фестивалот допатува и главната актерка Лина Абдула, како и кинематограферот Душан Кардалевски.
„Сакам да му се заблагодарам на Душан Кардалевски за одличната работа и трпението и на Лина која снимаше на минус 15 степени и која во текот на снимањето по повеќе повторени сцена почна да плаче од студ, но на крајот успеавме да го завршиме филмот“, рече Абдула.
Во ЕУ хаус во Струмица се одржа работилница „Вештачката интелегенција во филмот“ поддржана од Креативна Европа, на која говореа Милош Џукелиќ од Србија, Момчил Алексиев од Бугарија и Наташа Димитриевска од Канцеларијата на Креативна Европа во Македонија.
