„Ако задачата на воздухопловните сили, или воздухопловните сили на НАТО, е да бидат подготвени што е можно поскоро, можеби ќе мора да купиме системи што веќе се достапни на пазарот“, рече генерал-потполковник Холгер Нојман во интервју за бриселскиот портал.
Ваквите системи можеби не ги исполнуваат сите германски барања, рече тој, но сепак би можеле да бидат „најдобрите што можете да ги купите сега за следните неколку години“. „Развивањето на сопствените способности бара време. Немаме време во моментов“, рече Нојман.
Неговите коментари доаѓаат во време кога Европската унија се стреми да пренасочи поголем дел од своите трошоци за одбрана кон европските производители, намалувајќи ја својата зависност од главните американски добавувачи, додека европските земји брзо се вооружуваат за да ја одвратат Русија.
Европската унија користи нови финансиски инструменти за да ги охрабри земјите заеднички да набавуваат опрема и да ја зајакнат одбранбено-индустриската база на блокот. Новите правила за проекти финансирани од ЕУ го ограничуваат учеството на земјите надвор од Унијата, вклучувајќи ги и САД, на максимум 35 проценти од вредноста на проектот, што ги налути американските претставници.
Но, индустрискиот пресврт на ЕУ е долгорочен, додека потребите на војската се итни, пишува Политико.
Нојман рече дека европската индустрија има силни капацитети, но не развива најсовремени технологии со исто темпо како САД. Целта сега е да се пополнат сегашните празнини без да се напуштат европските проекти.
