Неодамнешна студија, во која се тестираше нов рендгенски уред на вселенско летало, покажа дека преносните медицински технологии би можеле да играат клучна улога, пренесува Еуроњуз. Членовите на екипажот, кои не се медицински експерти, ги направија првите дијагностички рендгенски снимки за време на лет во орбитата користејќи преносен безжичен дигитален генератор на рендгенски зраци.
Резултатите, објавени во списанието „Радиологија“, покажаа дека квалитетот на сликите е исто толку добар како и оние направени на Земјата. Истражувачите забележале дека сите слики направени за време на летот биле еквивалентни на оние направени пред полетувањето во однос на целокупниот квалитет и резолуцијата на сликата.
Изложеноста на зрачење не била поголема
Сепак, една од главните пречки останува правилното позиционирање на пациентот во микрогравитација, состојба во која предметите и луѓето изгледаат бестежински. Сликите од централното тело, како што се градите, карлицата и абдоменот, покажаа полошо позиционирање за време на летот во споредба со сликите од раката или подлактицата.
Студијата, исто така, открила дека проценетата изложеност на учесниците на зрачење не била поголема од онаа што е поврзана со стандардното клиничко снимање на Земјата. „Во областа на вселенската медицина долго сонуваме да имаме повеќе од еден метод за снимање за дијагностицирање болести и повреди во вселената“, изјави Шејна Гифорд, главна истражувачка на клиниката „Мејо“ во Минесота.
Новиот систем Спејсекс-реј им овозможи на членовите на екипажот без медицинска обука да прават радиографски снимки со само четири часа обука пред летот. Уредот беше тестиран за време на комерцијален лет на СпејсЕкс, кој беше лансиран на 31 март 2025 година и траеше три дена и 14 часа. За време на слетувањето и враќањето, генераторот на рендген претрпе површинско структурно оштетување, но внатрешните компоненти и способноста за емитување на икс-зраци останаа недопрени.
Може да биде корисно и во други средини
„Радиографски систем подготвен за вселенски летови би имал длабоки импликации не само за здравјето на екипажот, туку и за немедицинските задачи што се критични за мисијата“, рече Гифорд. „За одржливо човечко присуство во вселената, рендгенските зраци се неопходни не само за членовите на екипажот, туку и за другите компоненти на мисијата, како што се електрониката и вселенските одела. Единствениот начин да се погледне во внатрешноста на овие објекти, без да се расклопат, е со рендгенско снимање.“
Покрај медицинската примена, истражувачите нагласиле дека овој нов систем би можел да биде корисен и во средини како што се борбените зони или заедниците со ограничени ресурси, со цел да се прошири скринингот за болести, вклучително и тестирањето за туберкулоза. На крајот, напишаа авторите, и вселенските и копнените заедници ќе имаат корист од продолжувањето на развојот на ултрапреносната дигитална радиографија.
