„Топчиите“ денеска промовираа ново засилување, се работи за 21 годишниот Алберт Самби Локонга. Фудбалерот од средниот ред бил препорачан од легендарниот Тјери Анри, кој бил импресиониран од она што го видел, а зелено светло за трансферот дал и Винсен Компани, под чие водство младиот фудбалер ја доби капитенската лента во Андерлехт.
„Алберт е многу интелегентен играч кој покажува голема зрелост во играта. Забележа добар прогрес под водство на Винсен Компани и неговите соработници во Андерлехт. Го познавам Винсен многу добро и тој има високо мислење за Алберт“ – вели тренерот на Арсенал, Микел Артета.
„Убедени сме дека Алберт е подготвен за следната етапа од развојот и со нетрпение го чекаме“.
Детали од зделката не беа откриени, според пишувањата на медиумите, Арсенал за услугите на Алберт Самби Локонга ќе плати помеѓу 15 и 18 милиони фунти.
Тој е второ засилување ова лето откако на „Емирати“ пристигна Нуно Тавареш од Бенфика за 8 милиони фунти.
Арсенал исто така договори и трансфер од 50 милиони фунти на дефанзивецот Бен Вајт од Брајтон, Англичанецот треба да ги помине лекарските прегледи кога ќе се врати од одмор на 26. јули.
