Тие се меѓу 45-те обвинети во овој случај.
Според обвинението на Специјалното обвинителство на Косово, целта на напаѓачите била да се отцепи северот на Косово.
На 24 септември 2023 година, група вооружени Срби прво го блокирале мостот во селото Бањска кај Звечан со камион, а потоа нападнале припадници на косовската полиција кои дошле да ја отстранат блокадата.
Полицискиот водник Африм Буњаку и тројца напаѓачи беа убиени, а двајца полицајци беа ранети.
Приштина го окарактеризира нападот како терористички чин и ја обвини Србија за вмешаност, додека Белград ги отфрли тврдењата на властите во Приштина.
Судијата Нгадњим Арни, читајќи ја одлуката на судот, кажа дека сите тројца се виновни и наведе дека целта на вооружената група во Бањска била да ги дестабилизира основните структури на Косово.
„Преку добро организиран план, тие се обидоа да го одвојат северниот дел од територијата на Косово и да го припојат кон Србија“, кажа тој.
Тројцата обвинети се дел од група од 45 лица, меѓу кои и Милан Радоичиќ, тогашен потпретседател на Српската листа, најголемата српска партија во Косово, кој е опишан во обвинението како „шеф на терористичка група“.
Судот одлучи да ги одвои кривичните постапки против Спасојевиќ, Толиќ и Максимовиќ, кои се во притвор од септември 2023 година, и го отфрли барањето на Специјалното обвинителство на Косово за судење во отсуство за уште 42 лица. Тие се во бегство, а Косово распиша потерница на Интерпол по нив.
По изрекувањето на пресудата, специјалниот обвинител Наим Абази кажа дека одлуката е погрешна, бидејќи не ги вклучува останатите обвинети, вклучувајќи го и Милан Радоичиќ, но додаде дека Обвинителството вложува максимални напори да ги изведе пред лицето на правдата.
Оценувајќи го овој случај како најсложен во Косово, Абази рече дека пресудата е порака до сите оние кои се обидуваат да извршат такви дела дека ќе се соочат со „заслужената казна“.
На прашањето како Специјалното обвинителство планира да го изведе пред лицето на правдата главниот обвинет, Милан Радоичиќ, Абази рече дека ќе бидат искористени меѓународни механизми, како што е Интерпол.
„Србија сигурно ќе соработува бидејќи правдата, во овој случај, нема никаква врска со политиката. Нема компромис со правдата“, изјави Абази за медиумите по изрекувањето на пресудата.
Министерот за внатрешни работи на Косово Џељаљ Свечља изјави дека пресудата против тројцата обвинети претставува прв чекор кон правда за жртвата, убиениот полицаец Африм Буњаку.
Тој додаде дека сите обвинети за вооружениот напад во Бањска треба да се соочат со максимална казна.
„Правдата за Бањска не завршува тука. Таа ќе биде целосна само кога сите одговорни ќе бидат изведени пред лицето на правдата, на чело со Милан Радоичиќ“, напиша Свечља на Фејсбук.
Тој оцени дека нападот во Бањска не бил изолиран чин, туку „организирана операција со државна поддршка од Србија, со цел загрозување на уставниот поредок и анектирање на дел од територијата на Косово“.
„Денес е јасно: криминалните и паравоените структури на север се демонтирани. Уставниот поредок е заштитен. Сега останува Србија да биде одговорна за својата политичка, финансиска и логистичка улога во оваа агресија“, напиша тој.
Претседателката на Собранието на Косово и вршител на должноста претседател на Косово Аљбуљена Хаџиу изјави дека пресудата е „доказ дека нападот врз косовската полиција, уставниот поредок и безбедноста на нашата земја нема да останат неказнети“.
„Сепак, правдата за терористичкиот напад во Бањска не завршува тука. Ќе биде целосна само кога сите одговорни, предводени од Милан Радоичиќ, ќе бидат изведени пред лицето на правдата“, изјави таа.
Српска листа, најголемата партија на Србите во Косово, која има поддршка од Белград, ја осуди пресудата во случајот Бањско, наведувајќи дека не се презентирани „валидни докази“ и дека не е утврдена индивидуална одговорност.
„Оваа пресуда нема да ја задоволи правдата ниту оштетените страни – таа претставува одмазда која дополнително ја загрозува безбедноста и правата на српскиот народ“, се наведува во соопштението.
Ова е прв пат Српска листа да реагира на вооружениот напад во Бањска, а досега дури и не се дистанцирала од својот поранешен потпретседател Радоичиќ.
Како што е наведено во соопштението, „фактот дека на Србите во Косово и Метохија лесно им се припишуваат најтешките квалификации, како што се тероризам и криминал, е особено загрижувачки, без никаква реална основа во доказите“.
Тие ја повикаа меѓународната заедница да реагира и да обезбеди почитување на владеењето на правото и да гарантира еднакви права за сите граѓани, без оглед на националноста.
Канцеларијата за Косово на Владата на Србија оцени дека првостепената пресуда на судот во Приштина поради трагичните настани во Бањска е „драконска“.
Во соопштението се наведува дека таа е донесена „под директен политички притисок од Аљбин Курти и антисрпскиот режим во Приштина, кој од самиот почеток на процесот врши медиумска, политичка и каква било друга стигматизација и криминализација на уапсените Срби“.
Се наведува дека „трагичните настани во Бањска се последица на повеќегодишниот терор на режимот на Аљбин Курти врз српскиот народ на северот на Косово и Метохија“.
Во соопштението, канцеларијата, исто така, праша зошто никој не е одговорен за убиството на тројцата Срби за време на нападот.
Радоичиќ е во Србија и обвинението против него, иако беше објавено, сè уште не е поднесено.
Обвинетите Спасојевиќ, Толиќ и Максимовиќ ги негираа обвиненијата против нив на судското рочиште кое започна на 17 април 2025 година.
За време на судењето, Спасојевиќ изјави дека не нападнал никого со експлозиви или тешко оружје и дека не убил ниту повредил никого.
Тој, исто така, негираше дека имал намера да работи за отцепување на северно Косово и негово припојување кон Србија.
Толиќ призна дека бил во Бањска на 24 септември, но изјави дека мотивот за неговото присуство не бил опишан во обвинението.
Тој кажа дека не пукал во никого и дека немал пристап до експлозивни направи, додавајќи дека не може да го предвиди текот на настаните или нивните последици. Исто така, изјави дека бил тешко ранет, за што бил лекуван во Приштина.
Максимовиќ, кој бил вработен во хотелот „Рајска бања“, изјави дека на 24 септември се сретнал со своите пријатели во викендичка за да печат месо на скара.
Иако во неговиот телефон биле најдени видео снимки од нападот врз косовската полиција, како и од нејзиниот надзор, тој кажа дека не се сеќава на тие снимки.
Во завршниот збор на судењето, Обвинителството за тројцата обвинети побара изрекување казна доживотен затвор.
