Според ВМРО-ДПМНЕ, реализирана е рекордна исплата во износ од 2.028.714.243 денари, што претставува една од најголемите исплати досега и директно придонесува за подобрување на ликвидноста на земјоделските стопанства и зајакнување на руралната економија.
Од партијата оценуваат дека исплатата претставува потврда дека трудот и посветеноста на тутунопроизводителите се вреднуваат и почитуваат.
Во соопштението се наведува дека Владата за две години исплатила околу 15 милијарди денари субвенции за земјоделците, што, според ВМРО-ДПМНЕ, е за една милијарда денари повеќе отколку што СДС и ДУИ исплатиле за три години.
Од партијата посочуваат дека тутунопроизводството е една од најзначајните и стратешки земјоделски гранки во државата, од која егзистираат илјадници семејства, а македонскиот тутун со децении е препознатлив по својот квалитет и претставува значаен извозен производ.
ВМРО-ДПМНЕ наведува дека субвенциите денес се исплаќаат навремено и одговорно и дека Владата ќе продолжи со инвестиции, мерки и програми насочени кон развој на земјоделството, повисоки приходи за производителите и сигурна иднина за земјоделците.
Од партијата порачаа дека поддршката за тутунарите продолжува и дека земјоделството останува еден од највисоките приоритети на Владата.
