Од коалицијата оценуваат дека овој модел претставува нов пристап во кој границата не се гледа како пречка, туку како точка на поврзување, каде административните процедури се заменуваат со институционална координација и побрза динамика на движење.
Според Влен, системот носи реални придобивки за граѓаните, пред сè преку намалување на сезонските гужви, особено во летните месеци кога значително се зголемува сообраќајот меѓу Македонија и Албанија.
Од коалицијата посочуваат дека, покрај техничкиот аспект, воведувањето на „Уан стоп шоп“ претставува и јасен политички сигнал за продлабочување на регионалната соработка и зајакнување на економските, туристичките и семејните врски меѓу двете држави.
Побрзото движење на луѓето, наведуваат од Влен, значи и поголема размена, повеќе трговија и нови можности за развој на локалните бизниси од двете страни на границата.
Во соопштението се додава дека овој модел е дел од поширок регионален пристап кој веќе се имплементира и на границите со Косово и Србија, со цел воспоставување унифициран стандард за олеснување на движењето и зголемување на граничната ефикасност.
Од Влен оценуваат дека ваквиот чекор треба да послужи како пример за понатамошно унапредување на практичната регионална интеграција, во духот на европските стандарди за слободно движење.
