Според податоците на компанијата Кплер, два супертанкери под американски санкции, „Диона“ и „Херо 2“, превезоа вкупно 3,8 милиони барели иранска нафта. Трет танкер поврзан со Иран превезе уште еден милион барели.
Аналитичарите веруваат дека ова би можело да биде првиот знак за постепена нормализација на сообраќајот откако САД и Иран потпишаа меморандум за разбирање во понеделник, кој треба да ја заврши речиси четиримесечната војна. Официјалното потпишување на договорот е закажано за петок во Женева.
Tankers seen, Sonia I and Diona. pic.twitter.com/tf36Otlos2
— OSINTtechnical (@Osinttechnical) June 17, 2026
Деталите од договорот сè уште не се објавени, но се очекува повторно отворање на Ормускиот теснец и олеснување на американските санкции за извоз на иранска нафта.
Волстрит џурнал објави дека Вашингтон би можел веднаш да му дозволи на Иран да продава нафта и гориво во замена за ограничување на неговата нуклеарна програма по потпишувањето на договорот.
Ормускиот теснец беше еден од најважните светски поморски патишта пред војната, преку кој поминуваше околу петтина од глобалната трговија со нафта. За време на конфликтот, сообраќајот беше речиси целосно запрен од американската поморска блокада на иранските пристаништа и иранските ограничувања за бродовите поврзани со земјите што Техеран ги смета за противници.
Можноста за повторно отворање на водниот пат ги натера некои бродски компании да почнат да преместуваат танкери кон Персискиот Залив во очекување на зголемена побарувачка за превоз на нафта.
„Нивното ослободување од блокадата сугерира дека и други танкери што носат иранска нафта се подготвуваат да ја продолжат трговијата“, рече Мишел Визе Бокман, аналитичар во Виндвард.
Сепак, повеќето компании остануваат претпазливи. Лојдс лист интелиџенс соопшти дека бродската индустрија ја следела веста за договорот со „претпазливо неверие“, а не со ентузијазам.
Осигурителите сè уште имаат високи премии за воен ризик и бараат докази дека превозот низ Ормускиот теснец ќе биде безбеден на долг рок.
Според Кплер, дури 118 танкери натоварени со нафта би можеле да го напуштат регионот во рок од 15 дена од потпишувањето на договорот.
Поморската компанија Виндвард вели дека десетици големи танкери веќе го напуштиле Јужното Кинеско Море кон пристаништата во Обединетите Арапски Емирати, каде што најмалку 30 се закотвени и го чекаат развојот на настаните.
Засега, сообраќајот низ Ормускиот теснец останува минимален бидејќи двете страни ги одржуваат постојните мерки до официјалното потпишување на договорот во петок.
„Ништо не се променило и ништо нема да се промени додека не се потпише договорот“, рече Тим Вилкинс од здружението на независни компании за танкери Интертанко.
