Како што стои во партиското соопштение, преку Развојна банка за оваа линија кредити ќе се обезбедат нови 10 милиони евра кои ќе се слеат во стопанството.
„Износот на кредитите ќе се движи од 3.000 до 30.000 евра и ќе биде дефиниран во зависност од бројот на вработените и падот на приходите, додека роковите за отплата траат од 36 до 42 месеци со грејс период од 12 месеци. Со оваа кредитна линија е овозможена и грант компонента до 50% од висината на кредитот, доколку корисниците ги исполнуваат потребните услови, односно во 2021 година да имаат 5% повеќе вработени во споредба со 2020 година, а вкупните приходи во 2021 да се зголемени за 10% во однос на 2020 година или доколку е остварен само еден од условите може да добијат грантови од 20% или 30%“, се наведува во соопштението во кое се додава дека ова е финансиска поддршка за домашната економија, за спас на работните места и дополнително придвижување на економскиот раст.
