Омер Ајдини од Форумот на млади на Алијансата за Албанците пред Министерството рече дека бараат итна оставка од министерот за правда, заменик министерот и сите чинители кои ја презеле оваа иницијатива за помилување.
„Се наоѓаме пред Министерството за неправда да го изразиме својот револт во врска со иницијативата на ова Министерство за помилување на криминалците и крадците во оваа држава. Ова е кулминација и повеќе не може да се издржи. Станува збор за убиецот на малиот Алмир – Бобан Илиќ. Тоа се луѓето кои се спремни да ја згазат крвта на Алмир, нашата крв и само со единствена цел да ги чуваат своите министерски позиции. Пред Министерството за неправда симболично ја фрливме крвта на оние кои настрадаа од овие криминалци, за да ви покажеме дека се подготвени да ја нагазат оваа крв само за да ги бранат своите позиции. Бараме итна оставка од министерот, заменик министерот и целото раководство што ја презеде оваа иницијатива“, рече Ајдини.
