САД го обвинуваат Ел-Бахадли за злоупотреба на својата позиција и помагање во пренасочувањето на нафтата за продажба во Техеран и вооружените ирачки групи поддржани од Иран.
„ОФАК денес воведе санкции против Али Мари ел-Бахадли, кој имаше клучна улога во олеснувањето на пренасочувањето на ирачки нафтени производи во корист на познат трговец со нафта Салим Ахмед Саид, поврзан со Иран и терористичката група Асаиб Ал-Хак (ААХ), која е поддржана од Иран“, се вели во соопштението.
Американскиот Стејт департмент тврди дека Ел-Бахадли со години ја користел својата позиција за да ги збогати Саид, ААХ и Иран, прво како шеф на комитетот за нафта и гас на ирачкиот парламент, а потоа и во Министерството за нафта.
Според САД, Саид поткупувал соучесници во ирачката влада за да добие привилегиран пристап до нафта и фалсификувал документација, додека заменик-министерот за нафта Ел-Бахадли им доделил на своите компании права за извоз, со што му овозможил нелегално да набавува нафтени производи.
Во соопштението се вели дека Ел-Бахадли, исто така, одобрил дневен транспорт на нафта во вредност од неколку милиони долари од нафтеното поле Кајара до веќе санкционираниот терминал „ВС Оил“, кој го надгледувал мешањето на иранската нафта со ирачката нафта пред испораката.
Се наведува дека Ел-Бахадли е одговорен и за фалсификување на документацијата за потеклото на нафтата.
„Како банда разбојници, иранскиот режим ги ограбува ресурсите што со право му припаѓаат на ирачкиот народ. Министерството за финансии нема да стои настрана додека иранската војска ја експлоатира ирачката нафта за финансирање на тероризам против САД и нашите партнери“, изјави секретарот за финансии Скот Бесант.
