Ројтерс пишува дека недостигот е особено изразен на Крим, каде што се заострени ограничувањата за јавните служби и активностите.
Рускиот претседател Владимир Путин за прв пат коментираше за неодамнешните украински напади врз цивилната инфраструктура, вклучувајќи ја и московската рафинерија за нафта, велејќи дека тоа е обид за дестабилизација на општеството. Тој ја повика владата да преземе дополнителни мерки за ублажување на последиците од нападите.
Бројни области низ Русија, третиот најголем производител на сурова нафта во светот, објавија ограничувања за продажба на гориво, зголемување на цените на нафтата и долги редици на бензинските пумпи.
Украинските напади врз руските рафинерии веќе ја принудија Москва да го забрани извозот на бензин и авионско гориво.
Весникот Ведомости објави дека увозот бил споменат како една од можностите на состанокот со кој претседаваше вицепремиерот Александар Новак во понеделникот.
Вчера, на владина седница со која претседаваше Путин, Новак изјави дека Русија размислува за забрана на извозот на дизел и промена на даночната легислатива за да му помогне на домашниот пазар на горива. Тој додаде дека нафтените компании ги одложиле работите за одржување на рафинериите и ги користат резервите на гориво за да ја задоволат побарувачката.
„Користиме резерви кои не беа активирани претходно, а исто така охрабруваме зголемување на дополнителните испораки на домашниот пазар. Во координација со владата, подготвени се соодветни измени во даночната легислатива“, кажа Новак.
Ројтерс пишува дека рускиот извоз на дизел и гасно масло по море се зголемил во април за осум проценти во споредба со март, на околу 3,25 милиони тони, но тоа е само малку пониско отколку во истиот месец минатата година, кога изнесувал 3,3 милиони тони.
Според агенцијата, извозот останал стабилен во мај. Бразил и Турција се меѓу главните увозници на руски дизел.
Два извори од индустријата изјавија за Ројтерс дека се разгледувале субвенции за увезено гориво, со цел ограничување на цените, чувствително прашање за граѓаните и можен поттик за поширока инфлација.
Властите во рускиот контролиран град Севастопол на Крим соопштија дека го ограничиле работното време на јавниот превоз, продавниците, кафулињата и уличните светилки, како и дека ги забраниле масовните активности на отворено, покрај претходно објавените ограничувања за продажба на гориво.
Михаил Развожаев, рускиот гувернер на Севастопол, градот каде што е сместена руската Црноморска флота, објави во понеделникот вечерта за „спроведени привремени мерки“, вклучително и суспендирање на јавниот превоз во 22 часот и затворање на големите продавници и кафулиња во 20 часот. Уличните светилки се пригушени.
Производството на бензин во Русија минатата недела беше околу 25 проценти под дневниот просек од јуни 2025 година, соопштија извори од индустријата. Според податоците од ЛСЕГ и пазарни извори, извозот на нафтени производи по море во првата половина на јуни се намалил за околу 15 проценти во споредба со првата половина на мај, поради непланирани работи во рафинериите по повторените напади со беспилотни летала.
Четири извори од индустријата минатата недела изјавија дека се очекува Русија да почне да увезува гориво по море во јуни, бидејќи се обидува да го намали недостигот на бензин.
Кризата се прелеа и на финансиските пазари. Рубљата вчера ослабе и ја премина границата од 75 за долар за прв пат од 6 мај, додека руските акции паднаа на најниско ниво во последните три години. Московскиот берзански индекс потона за пет проценти на 22 јуни, пред делумно да се крене.
Аналитичарите и трговците велат дека распродажбата е дополнително поттикната од падот на глобалните цени на нафтата по разговорите меѓу Соединетите Американски Држави и Иран, недостигот од напредок во преговорите за завршување на војната во Украина, како и намалувањето на клучната каматна стапка на руската централна банка минатата недела, кое е пониско од очекуваното.
„Сето ова води кон вистинска апатија на пазарот“, вели економистот Евгениј Коган, оценувајќи ја распродажбата како „капитулација“.
Руската економија, која во текот на четири и пол години војна покажа отпорност на западните санкции, почна да забавува минатата година, при што растот падна на еден процент, од 4,9 проценти во 2024 година.
По намалувањето на каматната стапка минатата недела, Централната банка на Русија предупреди дека падот на производството на гориво создава ризик инфлацијата повторно да почне да расте.
Акциите на државниот енергетски гигант Газпром, чија подружница Газпром њефт е сопственик на московската рафинерија што минатата недела беше погодена од беспилотни летала, паднаа за повеќе од пет проценти во понеделник, под 100 рубли, за прв пат од 2009 година.
Цените на руските државни обврзници ОФЗ исто така паднаа поради загриженоста за растечкиот дефицит поттикнат од зголемените воени трошоци, а владата вчера ја откажа аукцијата на обврзници, наведувајќи ја зголемената нестабилност на пазарот.
Портпаролот на Кремљ Дмитриј Песков, на прашањето за слабеењето на рубљата и падот на цените на нафтата, ја отфрли загриженоста и изјави дека нема основа за страв во врска со стабилноста на руската економија.
„Стабилноста на руската економија, макроекономската стабилност, е апсолутно загарантирана“, кажа тој вчера.
