Како што пишува британскиот весник Фајненшл тајмс (ФТ), „фламинго револуцијата“ почна поради јавниот гнев предизвикан од планираниот проект од 4 милијарди долари на Џаред Кушнер и Иванка Трамп на остров и во близина на природен резерват познат по фламингата.
Демонстрантите бараат Рама да поднесе оставка и да биде одговорен за она што го сметаат за системска корупција што им овозможува на меѓународните инвеститори да градат во заштитеното подрачје.
„Луѓето велат дека јас сум водач на сето ова. Јас им велам е..те се. Толку е едноставно. Не треба јас да докажам дека не сум Кум, туку тие треба да докажат дека сум“, рече Рама.
Албанските обвинители издадоа налози за апсење на повеќе од десетина бизнисмени под обвинение за трговија со дрога и перење пари, вклучувајќи еден кој претходно поседувал земјиште во областа што ќе се развива како дел од проектот на Кушнер и неговата сопруга Иванка Трамп.
Портпаролот на Кушнер и неговите други партнери во Албанија не одговорил на барањата на ФТ за коментар.
Рама инсистира дека инвестициите на Кушнер се целосно легални и дека нема никаква врска со тековната истрага против претходниот сопственик на земјиштето.
„Да се каже дека албанската економија се базира на перење пари, тоа е ужасно“, кажа Рама за ФТ во својата канцеларија која гледа на булеварот каде што десетици илјади луѓе протестираат секоја вечер повеќе од три недели.
„Перењето пари е дел од нашата економија, но тоа не е толку голем проблем… Мислите дека нема перење пари во Лондон? Има. Но, можете ли да кажете дека британската економија во голема мера се базира на перење пари? Не“, додава тој.
Албанските обвинители за борба против корупцијата издадоа налози за апсење на 20 бизнисмени за кои тврдат дека биле вклучени во меѓународен шверц со дрога и перење пари. Се сомнева дека милијарди евра биле пренасочени кон големи градежни проекти по должината на јадранскиот брег и во главниот град на Албанија.
Меѓу бизнисмените што се цел на истрагата е и Артур Шеху, американско-албански државјанин кој живее во Мајами. Во 2025 година Шеху ѝ го продал земјиштето во близина на природниот резерват каде што се гнездат фламингата на компанијата Албанија ленд дивелопмент, поврзана со проектот Кушнер. Тој бизнис бил под лупа на обвинителите за борба против корупцијата, кои ги замрзнале плаќањата во вредност од 128 милиони евра до крајот на истрагата.
Шеху не одговорил на барањето на Фајненшл тајмс за коментар.
Рама вели дека неговата влада им дозволила на обвинителите поагресивно да ги водат случаите, што во исто време го зајакнало перцепцијата дека земјата е преплавена од корупција и организиран криминал.
„Во реалноста е токму спротивното. Албанија се бори како никогаш досега и денес е многу помалку корумпирана отколку што беше“, додава тој.
Тој ги повтори тврдењата дека протестите биле поттикнати од непријателите на американскиот претседател, вклучувајќи го и Иран.
Во претходните денови, медиумите на албански јазик ја објавија и изјавата на Рама за „меѓународно учество во протестите“, тврдејќи дека луѓе доаѓаат и од Косово и од Македонија.
„Постои голем интерес за уништување на овој проект… поради Трамп… Да не беше Џаред Кушнер… никој немаше да се грижи за фламингата, за Албанија, за ништо друго. Целата оваа омраза кон Трамп создава толку темелна ревизија“, изјави Рама за ФТ.
Тој изрази верување дека плановите за развој на крајбрежната област ќе бидат спроведени и покрај протестите.
„Најважно е инвеститорите да не се криминалци и да не се вклучени во перење пари… Ова се големи инвеститори. Ова е историска прилика за Албанија“, додава тој во интервјуто за ФТ.
