На прес-конференција во Москва Захарова кажа дека мерките што ги воведе администрацијата на американскиот претседател Доналд Трамп на почетокот на мај претставуваат нова ескалација на притисокот врз Куба, ја одразуваат нетолеранцијата на Вашингтон кон какво било несогласување и претставуваат оживување на Монроовата доктрина, американска политика од 1823 година која ја предупредуваше Европа да не се меша во работите на западната хемисфера.
„Во овој контекст ја потврдуваме нашата целосна солидарност со Куба и ги осудуваме обидите за заплашување, уцена и нелегални еднострани санкции“, порача таа.
Захарова ги отфрли и, како што изјави, апсурдните тврдења дека Куба се подготвува да ги нападне САД, додавајќи дека тие предизвикуваат само смеа поради очигледната огромна нерамнотежа меѓу двете земји во сите аспекти.
„Ќе продолжиме да му пружаме најактивна поддршка на братскиот кубански народ во овој исклучително тежок период. Хавана е информирана за модалитетите и другите фундаментални аспекти на таа поддршка“, кажа таа.
Коментирајќи ги изјавите на украинскиот претседател Володимир Зеленски за декретот на рускиот претседател Владимир Путин со кој се поедноставува пристапот до руско државјанство за жителите на Приднестровие, Захарова предупреди дека секоја агресија врз руските граѓани кои живеат во тој отцепен молдавски регион ќе добие итен и соодветен одговор, додавајќи дека Москва е подготвена да ги употреби сите потребни средства за да ја осигури нивната безбедност.
Захарова ги критикуваше и изјавите на молдавскиот премиер Александру Мунтеану, наведувајќи дека неговите предупредувања звучат карикатурално со оглед на тоа што претседателката на Молдавија Маја Санду има државјанство на друга земја.
Зборувајќи за Африка, Захарова изрази загриженост во врска со извештаите за епидемии на ебола во Демократска Република Конго и Уганда.
Таа кажа дека руски експертски тим ќе отпатува во Кампала на 25 мај на барање на Уганда за да помогне во епидемиолошките истраги и напорите за спречување на ширењето на болеста со користење на руски дијагностички тестови за ебола.
Таа додаде дека Русија веќе бесплатно доставила две мобилни лаборатории во Конго и изрази надеж дека властите на двете земји, заедно со меѓународните партнери, ќе можат брзо да ја стават епидемијата под контрола.
Захарова кажа и дека Русија одговорила на барањето на сомалискиот премиер Хамза Абди Баре за хуманитарна помош со испраќање 25 тони храна и основни непрехранбени производи.
Хуманитарниот товар, кој беше доставен со авион на руското Министерство за вонредни ситуации, бил предаден на владата на Сомалија на меѓународниот аеродром Могадишу на 15 мај.
