Навка, поранешен олимписки победник во уметничко лизгање, беше додадена на списокот на санкции на ЕУ во јуни 2022 година против лица поврзани со агресијата во Украина. Ќерката на Песков, Елизавета, и синот Николај, исто така беа на истиот список.
Брисел, при усвојувањето на мерките, кои вклучуваат забрана за патување во ЕУ и финансиски ограничувања, изјави дека тие се воведени „поради дејствија што го поткопуваат или загрозуваат територијалниот интегритет, суверенитетот и независноста на Украина“.
Податоците објавени на порталот ЕУР-Лекс на ЕУ покажуваат дека 51-годишната Навка, родена во советска Украина, но сега руски државјанин, бара укинување на санкциите преку Судот на правдата на Европската Унија.
Во правниот поднесок се наведува дека Навка тврди дека причините за санкциите не биле правилно објаснети, дека биле направени правни грешки и неточни проценки на фактите и дека ЕУ не докажала доволна врска помеѓу нејзе и наведената цел на санкциите. Од Советот на Европската Унија бара отштета во износ од нешто повеќе од два милиони евра, пишува Ројтерс.
Друга официјална база на податоци на ЕУ покажува дека Екатерина Игнатова, сопругата на Сергеј Чемезов, раководител на државната одбранбено-индустриска корпорација Ростек, се обидува да ги оспори санкциите преку истите правни средства.
