Експертот за сајбер-безбедност Џеремаја Фаулер изјави за британскиот весник „Сан“ дека базите на податоци што содржат телефонски броеви и приватни електронски адреси на многу познати личности се достапни онлајн.
Тој додаде дека меѓу податоците е пронајдена датотека со информации за уреди поврзани со мејл-адреси, вклучувајќи модели на телефони, верзии на оперативни системи и интернет-прелистувачи, што би можело да им обезбеди на напаѓачите дополнителни информации.
„Она што беше навистина интересно е тоа што постоеше датотека со информации за нивните уреди врз основа на електронската пошта. Во неа беше наведено која верзија на ајфон користат, дали го користат интернет-прелистувачот Сафари и која верзија на софтвер користат. Тоа би можело да им даде на лошите актери многу дополнителни информации“, рече Фаулер.
Според неговите зборови, четирите компромитирани бази содржеле околу 666.000 записи од периодот од 2019 до 2026 година, поврзани со годишниот филмски фестивал во Њујорк, кој го основал Роберт Де Ниро.
Меѓу наведените имиња се и режисерите Мартин Скорсезе, Џорџ Лукас и Дени Бојл, како и актерите Морган Фримен, Џенифер Лоренс и Винона Рајдер.
Поголемиот дел од податоците се однесуваа на маркетинг-материјали, но една база на податоци наводно содржела броеви на мобилни телефони и е-адреси на познати личности, за кои експертот верува дека би можеле да бидат нивни приватни контакти.
Фаулер предупреди дека ваквите протекувања би можеле да овозможат обиди за „фишинг“ – напади со малициозен софтвер и измами во кои напаѓачите би можеле да се претстават како пријатели или членови на семејството на жртвите.
„Ова е убедливо најголемата колекција на податоци за познати личности што некогаш сум ја видел“, рече Фаулер, истражувач во американската фирма за сајбер-безбедност „Блек хилс информејшн секјурити“.
Фаулер вели дека го известил филмскиот фестивал „Трибека“ за проблемот минатиот месец, неколку дена пред почетокот на 12-дневното издание на настанот. Организаторите тогаш изјавија дека сериозно ја сфаќаат безбедноста на податоците и дека го истражуваат инцидентот, додавајќи дека базите на податоци оттогаш се отстранети.
Засега не е познато колку долго податоците биле јавно достапни, ниту кој сѐ можел да им пристапи. Исто така, нема докази дека самиот филмски фестивал е одговорен за наводното протекување.
Случајот следува по серија претходни сајбер-напади врз познати личности, вклучувајќи го и големиот хакерски напад во 2020 година со кој беа компромитирани околу 130 сметки на тогашниот Твитер, вклучувајќи ги и оние на Илон Маск, Канје Вест, Ким Кардашијан, Барак Обама, Џо Бајден, Бил Гејтс и Џеф Безос.
Трибека е познат меѓународен филмски фестивал што се одржува секоја пролет во истоимената населба на Менхетен.
