Кога температурите ќе надминат 30 степени, чаша ледена вода изгледа како најдобро можно освежување. Сепак, стручњаците истакнуваат дека многу ладните напивки можат да предизвикаат краткотраен шок за организмот, особено по престој на сонце или по физичка активност.
Наглата промена на температурата може да предизвика стеснување на крвните садови и кај почувствителните лица да доведе до непријатност, главоболка или болки во стомакот. Поради тоа се препорачува водата да биде разладена, но не и ледена.
Најдобар избор е вода со температура меѓу 10 и 15 степени, бидејќи ефикасно го хидрира организмот без дополнително оптоварување. Исто така, важно е да се пие во помали голтки во текот на целиот ден, наместо одеднаш да се испие голема количина.
Покрај вода, во текот на летото се препорачува да се јаде храна богата со течности, како лубеница, краставица, диња и домат. Тие придонесуваат за хидратација и надополнување на минералите изгубени преку потење.
Децата, постарите лица и хронично болните треба да обрнат посебно внимание на внесувањето течности, бидејќи се почувствителни на ефектите од дехидрација. Експертите советуваат да не се чека жедта како сигнал за пиење вода, туку редовно да се пијат течности.
Соодветната хидратација е еден од најважните начини да му помогнете на вашиот организам да се справи со летните горештини, а малите промени во навиките можат да направат голема разлика.
