Знаците за придвижување на реакторот од 5 мегавати, кој може да произведе плутониум за оружје, најпрво биле забележани на крајот на 2018 година, соопшти во својот извештај Меѓународната агенција за атомска енергија (ИАЕА).
„Од почетокот на јули 2021 постојат индикации, вклучувајќи и испуштање на вода за ладење, карактеристични за работата“, наведено е во извештајот на ИАЕА за реакторот во Јонгбјон, нуклеарниот комплекс кој се наоѓа во центарот на севернокорејската нуклеарна програма.
ИАЕА нема пристап до Северна Кореја откако во 2009 година Пјонгјанг ги исфрли инспекторите од земјата. Земјата потоа продолжи со нуклеарната програма во која наскоро почна нуклеарни тестирања. Последниот нуклеарен тест беше извршен во 2017 година.
ИАЕА сега само ја набљудува Северна Кореја од надвор, главно преку сателитски снимки.
Комерцијалните сателитски снимки покажуваат испуштање вода, што оди во прилог на заклучокот дека реакторот е повторно активен, изјави Џени Таун, директорка на Северниот проект 38, со седиште во САД, кој ја нагледува Северна Кореја.
„Нема начини да знаеме зошто реакторот претходно не работел – иако се одвиваа работи во резервоарите со вода во текот на минатата година за да се обезбеди доволно вода за системите за ладење“, кажа таа.
„Моментот ми се чини малку необичен, имајќи ја предвид можноста од поплави во следните недели или месеци кои можат да влијаат на работата на реакторот“.
Минатата година Северниот проект 38 соопшти дека поплавите во август можеби ги уништиле изворите на вода кои се поврзуваат со Јонгбјон, истакнувајќи дека разладните системи на нуклеарните реактори се чувствителни на екстремни временски услови.
Сезонските дождови предизвикаа поплави во некои области годинава, меѓутоа нема извештаи за тоа дека го загрозуваат нуклеарниот комплекс, соопшти Нуклеарниот научно-истражувачки центар на Јонгбјон.
