Извор од Пентагон за Си-ен-ен изјавил дека воените операции во моментов се „ставени на пауза“. Генералот Кејн на состанокот посебно предупредил дека американските резерви на муниција се намалуваат и укажал на други можни негативни последици од продолжување на нападите.
Според еден од изворите, Кејн му рекол на Трамп дека војската може да ги спроведе достапните воени опции, но истовремено го предупредил и за нивните последици. Прашањето за резервите на оружје било само едно од повеќето предупредувања што претседателот ги добил на состанокот. Засега не е јасно дали токму тие предупредувања се главната причина за прекинот на нападите, ниту дали паузата ќе продолжи.
Директорот за комуникации на Белата куќа, Стивен Чунг, изјави дека Трамп и понатаму му дава предност на дипломатското решение.
„Претседателот Трамп постојано повторува дека приоритет му е дипломатско решение, но сите опции остануваат на маса ако Иран продолжи со терористички активности во Ормуски Теснец или против нашите сојузници“, рече Чунг.
Тој додаде дека по санкциите што силно ја погодиле иранската економија и по 13 дена напади врз воени цели, Иран би постапил мудро кога би работел на договор.
„Во спротивно, знаат што следува“, изјави Чунг.
По состанокот со кабинетот во петокот, Трамп пред новинарите потврди дека американски претставници активно преговараат со Иран. Истовремено, рече дека војската може да ги продолжи нападите, па дури и да го „зголеми интензитетот“. Тој додаде дека Иран сега, според него, „посериозно“ пристапува кон преговорите.
Еден од изворите навел дека администрацијата на Трамп и во петокот попладне разгледувала можни сценарија за натамошна ескалација на конфликтот. Земјите од Персиски Залив во разговорите со американските претставници повикале на воздржаност, но истовремено признале дека САД располагаат со единствени капацитети за дополнително заострување на конфликтот доколку се одлучат на таков чекор.
Си-ен-ен потсетува дека ова се случува во момент кога клучните американски резерви на оружје веќе се значително намалени и би можеле дополнително да се исцрпат доколку нападите врз Иран продолжат.
Иако Трамп јавно зборувал за можноста од масовен напад, приватно им порачал на своите преговарачи „да продолжат со разговорите“.
Според повеќе извори на Си-ен-ен, малкумина од најтесниот круг на Трамп и во Пентагон веруваат дека ограничените воени операции, без употреба на копнени сили, би ги дале посакуваните резултати.
Генералот Кејн и други високи воени команданти уште пред почетокот на војната го предупредувале Трамп дека долготрајната кампања може сериозно да ги исцрпи американските резерви на оружје.
Портпаролот на Пентагон, Шон Парнел, изјави дека американската војска и понатаму располага со доволно капацитети.
„Американската војска е најмоќната во светот и располага со сè што е потребно за дејствување во време и на место што ќе го избере претседателот. Успешно спроведовме многубројни операции низ светот и истовремено обезбедивме војската да располага со огромен арсенал за заштита на нашиот народ и нашите интереси“, рече Парнел.
