„НАТО и КФОР им остануваат целосно посветени на безбедноста и сигурноста на Косово“, соопшти генералот на американските воздухопловни сили Алексус Г. Гринкевич, врховен сојузнички командант за Европа (САЦЕУР).
„Токму таа посветеност придонесе за поголема стабилност, бидејќи безбедносните организации на Косово станаа поспособни. Сегашните услови создаваат можност за понатамошна оптимизација на големината и распоредот на силите на КФОР“, додаде тој.
Од НАТО соопштија дека намалувањето на бројот на војниците ќе се одвива во согласност со националните циклуси на ротација на контингентите, во периодот од сега до следната година.
Промените ќе се спроведуваат постепено и во согласност со состојбата на теренот, а доколку се појави потреба, НАТО ќе може да ја преиспита и да ја поништи оваа одлука.
КФОР е распореден на Косово од јуни 1999 година врз основа на Резолуцијата 1244 на Советот за безбедност на Обединетите нации и останува главната меѓународна безбедносна мисија во земјата. НАТО истакнува дека и покрај планираното намалување на силите, Алијансата ќе продолжи внимателно да ја следи безбедносната состојба и да обезбедува стабилност во регионот.
