Актерката од „Вљубениот Шекспир“ неодамна се појави во промотивно видео за „51 Парк“, нов станбен комплекс во Херцлија, израелскиот град што во 1924 година првично бил населен од ционисти на земјиште што претходно му припаѓало на палестинското село Ал-Харам, пишува Ентертејнмент викли.
Станува збор за комплекс од 51 кат во крајбрежниот град северно од Тел Авив.
Во рекламата, снимена во Њујорк и објавена оваа недела, Палтроу се буди во својот стан и оди на утринско трчање во Централ парк во Њујорк.
„Кој одлучил утрата да почнуваат толку рано? Дури и на моето кафе му треба кафе“, вели таа. „Будењето за утринско трчање знае да биде сурово. Но тоа е цена што сум подготвена да ја платам, бидејќи штом стигнам до паркот, ме обзема чиста енергија. Тешко е да се објасни. Постои причина зошто најлегендарните згради во светот се покрај парк.“
На крајот од рекламата, Палтроу влегува во автомобил и му вели на возачот:
„51 Парк.“
„Њујорк?“, ја прашува тој.
„Херцлија. Израел!“, одговара таа.
Компанијата за недвижности зад „51 Парк“, Авив бај Мелисрон, ја објави рекламата на Јутјуб и Инстаграм во неделата. Иако тие првични објави не привлекоа големо внимание, повторните споделувања на рекламата брзо станаа вирални, при што многу корисници на интернет ја критикуваа вмешаноста на Палтроу во кампањата.
Инстаграм-профилот Сент Хоакс во вторникот објави критички осврт на учеството на Палтроу во промотивната кампања. Во моментот на пишувањето на Ентертејнмент викли објавата имала повеќе од 236.000 допаѓања и предизвика многубројни коментари против актерката.
Алана Хадид, активистка за палестинската кауза и сестра на манекенките Бела и Џиџи Хадид, изрази неверување поради одлуката на Палтроу да се појави во рекламата.
„Човече, степенот на неконтролиран капитализам е неверојатен“, напиша таа на Инстаграм. „Сурово. Девојко, дали воопшто си отворила весник или си гледала вести? Ова не е ни нечувствителност, туку директно соучесништво.“
Инфлуенсерката за храна Мери Кристин Пападимос додаде:
„Се прашувам како изгледа будењето за осакатените, изгорени и изгладнети деца во Газа, кои живеат во искинати шатори полни со стаорци, на неподнослива жештина? Но на Гвинет навистина ѝ е тешко кога ќе се разбуди во својот мултимилионски дом, ќе го испие своето зелено смути и ќе излезе на тоа сурово утринско трчање 🥲. Знаев дека е ужасна и шарлатанка, но ова е морничаво.“
Иако Палтроу не ја објави рекламата на својот профил на Инстаграм, корисниците на социјалните мрежи ги преплавија нејзините последни објави со критички коментари поради учеството во промоцијата на проектот во Израел.
Дел од корисниците ја критикуваа што промовира недвижности во таа земја додека Појасот Газа е разурнат од војната, додека други објавуваа слики со палестински знамиња и пораки „Слободна Палестина“ на повеќе јазици, пишува Си-ен-ен.
Израел е обвинет од неколку организации за човекови права за геноцид во Газа и се соочува со тужба за геноцид пред Меѓународниот суд на правдата. Израелските лидери повеќепати ги отфрлија тие обвинувања, тврдејќи дека воената кампања е насочена кон поразување на Хамас.
Реакциите кон Палтроу укажуваат на ризикот од поврзување со Израел во ваков контекст, по три години војна во Газа, во која, според наводите, загинале повеќе од 72.000 Палестинци, како и по конфликтите во Либан и Иран.
Во слично истражување, Истражувачкиот центар Пју утврдил дека мнозинството луѓе во 36 земји имаат негативен став кон Израел и кон премиерот Бенјамин Нетанјаху. Вкупно 67 отсто од испитаниците имаат негативно мислење за Израел, додека само 25 отсто имаат позитивно.
Палтроу пораснала во мешано еврејско-христијанско семејство. Нејзиниот татко бил Евреин, а таа јавно зборуваше дека ги прославува еврејските празници и дека повеќе членови на нејзиното семејство биле рабини.
По нападот на Хамас на 7 октомври 2023 година, таа беше меѓу холивудските ѕвезди што потпишаа писмо до тогашниот американски претседател Џо Бајден, барајќи помош за ослободување на заложниците во Газа.
