Курти тврди дека граѓаните на таа област, позната како Прешевска долина, трпат големи последици поради блокадата на српските институции кои ги оневозможуваат да добијат помош од Косово.
„Поради неможноста за префрлање на средствата доделени од владата на Косово, нашиот северен сосед со своето ненормално однесување остава околу 3.650 ученици без бесплатни книги, повеќе од 750 ученици без стипендии, повеќе од 950 земјоделци без поддршка, како и училишта, медиуми и илјадници организации, вклучувајќи 90 деца без родители“, кажа Курти.
Тој објави дека ја пренел оваа загриженост до шефицата на дипломатијата на Европската Унија Каја Калас и повторно ја повика меѓународната заедница итно да реагира.
Прашањето за правата на Албанците во Прешевската долина, која ги опфаќа општините Прешево, Бујановац и Медвеѓа на југот на Србија, сè уште е едно од најчувствителните прашања во односите меѓу Косово и Србија.
Албанските политички претставници и косовските институции постојано изразуваат загриженост за институционална дискриминација, вклучувајќи прашања како наводна слаба застапеност во државните институции и недостиг од економски инвестиции, додека српските власти ги отфрлаат тие обвинувања.
