Кај компаниите кои плаќаат данок на добивка, по исклучување на субјектите кои имаат законски даночни ослободувања, даночната основа и пресметаниот данок бележат раст од 14 проценти во однос на претходната година. По пресметката и пребивањето со веќе платените аконтации, за доплата остануваат 5 милијарди и 805 милиони денари.
„Истовремено, за поврат на даночните обврзници се евидентирани 323 милиони денари, додека повеќе од 4,5 милијарди денари повеќе платен данок ќе бидат искористени за подмирување на аконтациите во 2026 година. Нето даночниот ефект е повисок за 33 проценти во споредба со претходната година, што според УЈП се должи на повисоките добивки на компаниите и на намаленото користење на даночни олеснувања“, информираа од УЈП.
Според нивните податоци, најголемиот дел од деловните субјекти и понатаму се микро и мали компании кои го користат поедноставениот даночен режим. Во рамки на овој систем, фирмите со годишен приход до три милиони денари се ослободени од плаќање данок, додека оние со приход меѓу три и шест милиони денари плаќаат данок од еден процент на вкупниот приход.
„Од вкупно 50.465 поднесени даночни биланси за вкупен приход, данок пресметале 3.883 обврзници, што претставува раст од 8,6 проценти во однос на 2024 година. Сепак, нето даночниот ефект кај овој вид оданочување изнесува 45,3 милиони денари и е понизок од претходната година, кога изнесувал 53,5 милиони денари. Раст на даночната основа е регистриран и кај трговците-поединци, занаетчиите, земјоделците и лицата кои вршат слободни занимања. Кај овие категории, даночната основа и пресметаниот данок се повисоки за два до три проценти во однос на 2024 година“, посочуваат од УЈП.
По завршената обработка на даночните биланси, УЈП најавува продолжување на активностите за откривање неподнесени пријави, наплата на даночните долгови, враќање на повеќе платениот данок и контрола на усогласеноста на даночните обврзници преку анализи на ризик и даночни контроли.
