Сиљановска-Давкова утре во Братислава ќе биде пречекана со највисоки државни и воени почести од претседателот на Република Словачка, Петер Пелегрини.
Предвидено е Сиљановска-Давкова и Пелегрини да одржат тет-а-тет средба, по што ќе следува пленарен состанок на македонската и словачката делегација.
Македонската претседателка ќе оствари средби и со претседателот на Националниот совет на Република Словачка, Рихард Раши, како и со потпретседателот на словачката Влада и министер за одбрана, Роберт Калинак.
Во рамки на посетата на Словачка предвидено е претседателката Сиљановска-Давкова да положи венец на Споменикот на слободата во близина на замокот Девин.
Во среда, претседателката Сиљановска-Давкова ќе ја посети групната изложба „Од глаголица до светлина: Визуелна ода за Св. Кирил и Методиј“, на која ќе бидат претставени дела од македонските уметници Ана Митевска, Ангел Коруновски, Лазе Трипков и Александра Костадиновска . Куратор на изложбата е Кирил Пенушлиски.
