„Како што е запознаена јавноста, лица купиле или добиле на дар парцели земјиште во општина Делчево. Истите парцели само неколку денови подоцна ги продале и за 40 пати повеќе од пазарната вредност за на нив да се изградат фотоволтаични централи. Меѓу лицата опфатени со предистражната постапка на Управата за финансиска полиција е и таткото на пратеникот од ВМРО-ДПМНЕ, Јован Јаулески. Според информациите од истрагата објавени во медиумите, едно од лицата кои препродало земјиште е и извесен Влатко И. кој е дел од обезбедувањето на Христијан Мицкоски. Другото лице кое препродавало ниви по 40 – кратно повисоки цени е извесен Дарко Т. советник од ВМРО-ДПМНЕ во општина Делчево од 2013 до 2017 година“, пишува во соопштението на СДСМ.
Партијата бара од лидерот на ВМРО-ДПМНЕ Мицкоски да одговори каква е неговата поврзаност и поврзаноста на неговата партија со овој скандал?
„Дали разликата од препродажбата како црни пари завршиле во Белиот дворец за што постојат оправдани сомневања? Јавноста очекува одговори на овие прашања, а истрагата на надлежните институции треба да ги даде сите детали за овој случај“, пишува во соопштението.
