Во соопштението од Левица посочуваат дека ВМРО-ДПМНЕ одбива да го повика Савески да постапи по случајот, иако премиерот Христијан Мицкоски претходно јавно повикувал по кои предмети треба да постапува новиот државен јавен обвинител.
Според партијата, и покрај тоа што Основното јавно обвинителство за гонење организиран криминал и корупција ја запрело истрагата, Савески има можност да побара увид во предметот, да ја провери законитоста на постапката и да наложи нови вештачења или прибирање докази.
Од Левица велат дека особено загрижуваат, како што наведуваат, „експедитивните кадровски и процесни потези“ по именувањето на новиот државен јавен обвинител, посочувајќи го како пример и предметот „Талир“.
„И покрај тоа што има законска обврска и овластувања да побара увид, да наложи дополнителни дејствија и да утврди дали постапката била водена законито, Савески останува пасивен и одбира да глуми ненадлежен“, наведуваат од Левица.
Партијата прашува дали ваквата пасивност е резултат на политички влијанија, додавајќи дека Савески треба да ги искористи законските механизми и да утврди како е затворена истрага во случај во кој, според нив, државата била оштетена за 169 милиони евра.
