Со својот поетски настап, се наведува во соопштението на КИЦ – Софија, таа не само што го претстави сопственото творештво, туку достојно го пренесе богатството на современата македонска литература, испраќајќи силна порака за универзалната моќ на поетскиот збор да ги надминува границите и да ги зближува луѓето и културите.
„Една од најважните мисии на Македонскиот културно-информативен центар во Софија е афирмацијата на македонската култура, јазик и книжевност надвор од границите на татковината. Во таа насока, Македонскиот културно-информативен центар во Софија, континуирано дава поддршка на македонските поети и писатели кои со своето творештво ја претставуваат Македонија на меѓународни книжевни фестивали и културни манифестации во Бугарија“, се вели во соопштението.
Македонските автори, додаваат оттаму, не се само учесници на овие настани, туку тие се амбасадори на македонскиот јазик, чувари на културната меморија и носители на современата македонска мисла. Нивното присуство на меѓународните книжевни сцени придонесува за поголема видливост на македонската литература, за нејзино вреднување во европски и светски рамки и за создавање нови мостови на културна соработка и разбирање.
„За Македонскиот културно-информативен центар во Софија, секој настап на македонски автор на меѓународен фестивал е повеќе од културен настан – тоа е чин на претставување на националниот духовен идентитет, можност за градење нови книжевни партнерства и потврда дека македонската литература има свое значајно место во современите европски културни текови“, велат од КИЦ – Софија.
Токму затоа, додаваат оттаму, Центарот останува посветен на создавање нови можности за промоција на македонските поети и писатели, уверени дека преку нивните дела светот го запознава богатството на македонскиот јазик, длабочината на македонската духовност и живата творечка енергија на современата македонска книжевност. Секој нивни успех е успех и на македонската култура, а секој нивни стих е нов прозорец низ кој светот може да ја препознае и почувствува Македонија.
