„Фактот дека нема да има студенти на листата на студентите е како да имате авиони без пилот, бидејќи не знаете кој ќе управува (…) Еден од слоганите на нас кои сакаме нормална и пристојна Србија може да биде луѓето да гласаат за студентите, бидејќи ќе има многу студенти на нашата листа, бидејќи нема да има ниту еден на нивната листа. За да можат луѓето да знаат дека кога гласаат за студенти, гласаат за нашата листа“, им кажа Вучиќ на новинарите од Србија кои го придружуваа на посетата на Баку, Азербејџан.
Според него, кога студентите биле прашани каде победиле, бидејќи учествуваа на локалните избори, тие „самите признаваат дека победиле во лекарските и адвокатските комори“.
„Ги претворија нашите еснафи во партиски здруженија. Разбирате ли каде нè води ова? Нè води во друштвото на (поранешниот камбоџански диктатор) Пол Пот и (поранешниот претседател на Уганда) Иди Амин. Нè води кон најлошата можна диктатура“, оцени Вучиќ.
Зборувајќи за Меморандумот за Косово и Метохија кој го претставија студентите демонстранти, Вучиќ кажа дека „се раскараа за тоа повеќе од што било друго“.
„Бидејќи некои би сакале да привлечат патриотски ориентирани гласачи, но ова мнозинство не им дава, и јасно им става до знаење дека Косово е независно и дека не треба да зборуваат за тоа“, тврди Вучиќ.
Според него, студентите демонстранти не ја разбираат ситуацијата во Косово и Метохија и ја обвинуваат Српската листа за лошиот третман на Србите што живеат во тие области.
„Тие арогантни, препотентни, млади луѓе не знаат дека ние даваме многу пари за нашите луѓе на Косово и Метохија. Тие врска немаат. Ништо не им е јасно и ништо не разбираат. Тие само знаат дека одат против својата земја и го критикуваат својот народ“, кажа Вучиќ.
Тој оцени дека владата е виновна што не тргнала на време „во борба за објаснување на луѓето што е тоа што се случува“ со студентските протести, додавајќи дека доцнеле првите три или четири месеци.
„Сите мои соработници ме убедуваа, претпоставувам уплашени од силата на улиците, од страв човек често си го валка лицето… После тоа, кога донесовме одлука да се спротивставиме, работите почнаа да се менуваат и денес работите одат добро“, кажа Вучиќ.
На прашањето како ги гледа критиките упатени кон властите за основањето на „Факултетот за српски студии“ во Ниш, тој кажа дека државата ќе продолжи да помага и да ја поддржува новоформираната високообразовна институција.
„Факултетот за српски студии е добар факултет со добри предмети и суштина (…) На народот тоа не му пречи. Некои луѓе губат дел од своите лични привилегии и затоа се бунат“, оцени Вучиќ.
Студентите и граѓаните протестираа во неколку наврати поради писмото од Министерството за образование, кое стигна до Филозофскиот факултет во Ниш, дека дозволата за работа на катедрата за српски студии, историја и руски јазик е отповикана и дека тие ќе бидат дел од идниот „Факултет за српски студии“.
