Претходно, Вучиќ изјави дека нема да учествува во одбележувањето на годишнината, кое го нарече „прослава на отцепувањето од Србија“.
„Добив покана да учествувам во гламурозна прослава на отцепувањето од моја Србија. Секако дека нема да учествувам на тоа“, кажа Вучиќ. Тој додаде дека го почитува правото на Црна Гора да организира прослава, но дека таков настан го доживува како прослава на отцепувањето од Србија.
Вучиќ изјави и дека ѝ посакува на Црна Гора „успех и среќа“ и нагласи дека Србија треба да продолжи со својот економски развој и зајакнување на регионалните односи.
Во соопштението за медиумите на црногорското Министерство се наведува дека Црна Гора ја обновила својата независност на 21 мај 2006 година на демократски референдум, во согласност со меѓународното право и стандардите на Европската Унија.
Министерството истакна дека Црна Гора „не се отцепила“ од Србија, туку дека двете земји биле рамноправни членки на државната заедница по распадот на поранешната СФРЈ. Тие исто така нагласија дека враќањето на независноста на Црна Гора ѝ овозможило на Србија да го продолжи својот државно-правен континуитет како независна држава.
Се додава дека е неприфатливо годишнината од независноста да се претставува како чин насочен против Србија или српскиот народ, и се нагласува дека Црна Гора го слави тој датум во чест на волјата на своите граѓани и правото на самоопределување.
Министерството изрази загриженост за, како што наведуваат, континуитетот на наративот кој ја доведува во прашање црногорската државност и ја поттикнува поделбата.
Во соопштението за медиумите се нагласува дека Црна Гора останува посветена на развојот на добрососедските односи со Србија, но дека тие мора да се темелат на рамноправност и меѓусебно почитување, без, како што се наведува, „навредливи квалификации и историски ревизионизам“.
Заклучено е дека годишнината од враќањето на независноста ќе биде одбележана „со достоинство, гордост и на европски начин“, со порака дека одлуката на граѓаните од 2006 година останува темел на модерниот државен пат на Црна Гора.
