За Венс, тоа е непријателска територија, бидејќи меѓу водителките на популарното дневно ток-шоу доминираат критичари на администрацијата на Доналд Трамп.
На појавувањето му се дава дополнителна политичка тежина од фактот што Федералната комисија за комуникации на Трамп врши притисок врз Еј-би-си и нејзината матична компанија Дизни во последните месеци, вклучително и покренување истрага за емисијата „Вју“. Иако истрагата не беше спомената за време на гостувањето на Венс, беа покренати бројни други теми.
Потпретседателот за себе рече дека „донекаде е теоретичар на заговор кога станува збор за случајот Епстин“, додавајќи дека сака целосна транспарентност на владата во врска со починатиот осуден сексуален престапник Џефри Епстин.
Тој исто така се обиде да ја објасни неодамнешната изјава на Трамп „Ја сакам инфлацијата“, велејќи дека претседателот всушност мислел на тоа дека инфлацијата ќе падне после војната. На што водителката Џој Бехар одговори: „Дали сте негов преведувач или негов потпретседател? Ајде, ве молам“.
Во дискусија за односот на администрацијата кон малцинствата, Венс инсистираше дека „секој е добредојден во нивната политичка коалиција“, како одговор на прашањата од Вупи Голдберг.
Голдберг го претстави Венс, велејќи: „Оваа емисија беше домаќин на илјадници луѓе со многу различни ставови и веќе некое време го покануваме нашиот следен гостин да ни се придружи. Драго ни е што денес ја прифати поканата“.
Венс првично се обиде да ја разбие тензијата со шега: „Ова е емисија на МАГА републиканци, нели? Барем така ми кажа мојот медиумски тим“.
Иако ги повика гледачите да ја купат неговата нова книга „Причест“, поголемиот дел од разговорот беше посветен на актуелните политички прашања. Зборувајќи за растечките трошоци за живот, тој ги повтори вообичаените републикански аргументи, признавајќи дека „сè уште има многу работа“, но исто така тврдејќи дека администрацијата „остварува напредок“.
Во врска со Епстин, тој ги потврди наводите од претстојната книга „Промена на режимот“ од новинарите Меги Хаберман и Џонатан Свон, според кои шефицата на кабинетот на Белата куќа, Сузи Вајлс, приватно го опишала како теоретичар на заговор.
„Ја сакам Сузи, но да, таа мисли дека сум теоретичар на заговор кога станува збор за Епстин. Мислам дека е лудо што личност за која е очигледно дека е сексуален предатор била во друштво на многу богати и моќни луѓе. Тоа многу ми пречи и сакам целосна транспарентност“, рече Венс.
Тој постојано се соочуваше со водителките кога потсетуваа на врските на Трамп со Епстин. Притоа, тој изјави дека Трамп и Епстин биле пријатели уште во 1980-тите, иако нивните блиски контакти биле документирани главно во текот 1990-тите.
Според документите на ФБИ, Трамп ја повикал полицијата во Палм Бич во средината на 2000-тите откако започнала истрагата за Епстин и рекол: „Фала му на Бога што ќе го спречите. Сите знаеја дека го прави тоа“. Ванс го опиша повикот како пример за тоа како Трамп „го пријавува Епстин во полиција и на крајот тоа доведе до неговиот пад“, иако истрагата веќе беше во тек во тоа време.
Голдберг го праша: „Што им направиле црнците на оваа администрација за да бидат толку стигматизирани?“ Како пример, таа го наведе отстранувањето на одредени музејски изложби.
Водителката Сани Хостин продолжи тврдејќи дека „историјата на црнците се бриши од јавните простори, изборните единици доминирани од црни гласачи се укинуваат, а црните политички лидери се маргинализирани“. Потоа праша: „Каде се вклопуваат Американците од другите раси во таа визија?“
Ванс повтори дека сите се добредојдени во политичката коалиција на администрацијата и дека таа ја слави „целата историја“.
Еден ден претходно, за време на значително попријателско гостување на Фокс њуз, водителот Шон Ханити го праша зошто воопшто се согласил да дојде во „Вју“. „Го познавате претседателот. Неговата позиција, како и мојата, е дека треба да се оди насекаде и да се обиде да се пренесе пораката до сите“, одговори Ванс.
Промотивната кампања за книгата „Причест“ се чини дека дава резултати. На денот на објавувањето, книгата се најде на врвот на листата на најпродавани нови изданија на Амазон. Книгата „Промена на режимот“, која излегува следната недела, се најде на второто место.
