Објавената слика ја прикажува територијата на Венецуела исполнета со боите на американското знаме.
Објавата доаѓа во време кога Трамп, според извештаи од Вашингтон, сериозно размислува за идејата за припојување на Венецуела кон САД. Планот на Трамп вклучува преземање целосна контрола врз нафтената индустрија во земјата по отстранувањето на долгогодишниот претседател Николас Мадуро од власт.
Во неодамнешно телефонско интервју за Фокс њуз, Трамп истакна дека Венецуела има нафтени резерви чија вредност се проценува на 40 трилиони долари. „Венецуела го сака Трамп“, рече претседателот, додавајќи дека ужива силна поддршка од тамошниот народ.
Американските воени сили го заробија Николас Мадуро во јануари оваа година откако Министерството за правда го обвини за нарко-тероризам. Кратко потоа, Трамп објави дека САД ќе ја надгледуваат Венецуела за време на транзицискиот период, во соработка со потпретседателката Делси Родригез.
Главната цел на американската администрација е да ги оживее операциите на нафтените гиганти како што се Ексон и Конокофилипс. Овие компании беа принудени да ја напуштат земјата пред речиси 20 години откако поранешниот претседател Уго Чавез ја национализираше нафтената индустрија. Шеврон беше единствената голема американска нафтена компанија што продолжи да работи во Венецуела.
Администрациските службеници и советниците за енергија поминаа месеци обидувајќи се да ги убедат големите нафтени компании да се вратат и да инвестираат. Под американска контрола на нафтениот сектор, извозот на Венецуела надмина милион барели дневно во април за прв пат од 2018 година.
Портпаролот на Белата куќа го пофали зајакнувањето на односите меѓу двете земји, велејќи дека Трамп ја заслужува сета заслуга за партнерството и економското закрепнување на Венецуела. Претседателот предизвика шпекулации за анексија уште во март, кога накратко на Трут соушл напиша: „ДРЖАВНОСТ, БР. 51, НЕКОЈ?“
Сепак, идејата Венецуела да стане 51-ва американска држава не е добредојдена од сите. Наследничката на Мадуро, Делси Родригез, категорично ја отфрли можноста, велејќи дека Венецуелците ја ценат својата независност пред сè и никогаш не би се согласиле да станат дел од Соединетите Американски Држави.
Венецуела не е единствената земја на која Трамп „ѝ го фрлил окото“. Листата на територии за кои Трамп јавно расправаше за анексирање или купување, исто така, ги вклучува Гренланд, Канада, Куба и Панама. Денешната објава на мапата јасно укажува дека претседателот не планира толку лесно да се откаже од проширувањето на американските граници на југ.
